काठमाडौं । प्रधानमन्त्री केपी शर्मा ओलीले राष्ट्रको विकासलाई प्राथमिकतामा राख्दै सुरु गरिएका पूर्वाधार परियोजनाहरू क्रमशः सम्पन्न गर्ने प्रतिबद्धता व्यक्त गर्नुभएको छ। आजदेखि थाइ एयर एसियाले गौतमबुद्ध अन्तर्राष्ट्रिय विमानस्थलबाट भैरहवा-ब्याङ्कक उडान प्रारम्भ गरेसँगै प्रधानमन्त्री ओलीले सामाजिक सञ्जाल फेसबुकमार्फत यस विषयमा आफ्नो धारणा राख्नुभएको हो।
प्रधानमन्त्रीले एयर एसियाको विमानलाई पानीको फोहराले गरिएको स्वागतको ३७ सेकेण्डको भिडियो साझा गर्दै भन्नुभएको छ, ‘भैरहवा विमानस्थलबाट अन्तर्राष्ट्रिय उडान सुरु भएको छ। थालेका कामहरूलाई क्रमैसँग सम्पन्न गर्नेतर्फ हामीले ध्यान दिइरहेका छौँ।’
नेपाल नागरिक उड्डयन प्राधिकरणका अनुसार थाइ एयर एसियाले आगामी शनिबारदेखि हरेक सोमबार र बिहीबार गौतमबुद्ध अन्तर्राष्ट्रिय विमानस्थलबाट नियमित उडान सञ्चालन गर्नेछ।
