मुम्बई । मुम्बई प्रहरीले बलिउड अभिनेता सैफ अली खानमाथि चक्कु आक्रमणको घटनामा संलग्नताको आशंकामा एक सुतारसँग सोधपुछ गरेको छ। ती सुतारले घटना हुनुभन्दा दुई दिनअघि खानको फ्ल्याटमा काम गरेका थिए। यो जानकारी शुक्रबार एक अधिकारीले दिएका हुन्। अधिकारीका अनुसार ती व्यक्तिको नाम वारिस अली सलमानी हो।
बान्द्रा प्रहरीले सलमानीलाई सोधपुछका लागि लगेको थियो। उनी चोरीको प्रयास गर्ने क्रममा बिहीबार बिहानै ५४ वर्षीय खानमाथि चक्कुले आक्रमण गर्ने भनिएका सीसी क्यामेरामा देखिएका आक्रमणकारी जस्तै देखिन्थे । बिहीबार सार्वजनिक भएको सीसीटीभी फुटेजमा आक्रमणकारीको अनुहार स्पष्ट देखिएको थियो। राति करिब २ः३० बजे रातो गम्छा र झोला बोकेर ‘सतगुरु शरण’ नामक भवनको छैटौँ तल्लाबाट सीढी हुँदै तल भागिरहेको देखिएको थियो। यही भवनमा खान बस्छन्।
सलमानीले घटना हुनु दुई दिनअघि खानको फ्ल्याटमा काम गरेका थिए। ठेकेदारले उनलाई आक्रमणबारे जानकारी गराएको थियो। प्रहरीले लामो समयसम्म सोधपुछ गरेपछि उनलाई अर्को अज्ञात स्थानमा लगेको बताइएको छ। प्रहरीका अर्का अधिकारीले नाम नबताउने शर्तमा जानकारी दिए अनुसार बान्द्रा थानामा ल्याइएका व्यक्तिको खानमाथि भएको आक्रमणसँग कुनै सम्बन्ध फेला परेको छैन।
अभिनेता खानको लीलावती अस्पतालमा उपचार भइरहेको छ। अहिलेसम्म कसैलाई पक्राउ गरिएको छैन। आक्रमणकारीको पहिचान र पक्राउका लागि ३० भन्दा बढी टोली गठन गरिएको छ। आक्रमणकारीको उमेर ३५ देखि ४० वर्षको बीचमा भएको अनुमान गरिएको छ। महाराष्ट्रका गृहराज्य मन्त्री (शहरी) योगेश कदमले यो घटनाको उद्देश्य लुटपाट रहेको स्पष्ट पारे। साथै, खानमाथि चक्कु आक्रमणमा कुनै अन्डरवर्ल्ड गिरोह संलग्न नरहेको बताए। शुक्रबार चिकित्सकहरूले खानको घाँटीसहित विभिन्न भागमा चक्कु प्रहार भएको बताएका छन्। लीलावती अस्पतालमा उनको आपतकालीन शल्यक्रिया गरिएको थियो र अहिले उनको स्वास्थ्यमा सुधार आइरहेको छ।
