चीनको पहिलो कोर्गी प्रहरी कुकुर ‘फुजाई’लाई ड्युटीमा सुत्ने र आफ्नै खाना कटोरामा पिसाब फेर्ने कारणले वर्षको अन्त्य बोनस कटौती गरिएको छ।
फुजाई २०२३ अगस्ट २८ मा जन्मिएको हो र सन् २०२४ जनवरीमा चार महिनाको उमेरमै विस्फोटक खोजीमा सहयोग गर्ने आरक्षित प्रहरी कुकुरको रूपमा काम थालेको थियो। छोटो खुट्टा, क्यूट मुस्कान र विशेष क्षमता भएकाले इन्टरनेटमा चर्चित बन्यो।
सन् २०२४ को अक्टोबरमा फुजाई पूर्णरूपमा योग्य प्रहरी कुकुर बन्न सफल भयो। यसको कथा ‘कोर्गी प्रहरी कुकुर फुजाई र यसको साथीहरू’ नामक सामाजिक सञ्जाल खाताबाट साझा गरिँदै आएको छ, जसका ३.८ लाखभन्दा बढी फलोअर्स छन्।
जनवरी १९ मा पोस्ट गरिएको भिडियोमा फुजाईले वर्षभरि धेरै सुरक्षा कार्य पूरा गरेको भन्दै पुरस्कारस्वरूप रातो फुल, खेलौना र स्वादिष्ट खाना दिइएको देखाइयो। तर, पछि एक अधिकारीले ‘ड्युटीमा थकित हुनु र आफ्नै कटोरामा पिसाब गर्नु’ गलत भएको भन्दै फुजाईको खाना फिर्ता लिएको घोषणा गरे।
यो भिडियो इन्टरनेटमा भाइरल भयो। एक जनाले लेखे, “बेचारा फुजाई, वर्षभरि काम गरेर पनि बोनस गुमायो। म यसको पीडा बुझ्छु।”
यस्तै चर्चा चलिरहेका बेला अर्को भिडियो पोस्ट गर्दै प्रहरी विभागले फुजाईलाई विशेष नयाँ वर्षको उपहार दिएको जानकारी गरायो। उपहारमा प्रशान्त महासागरको हेरिङ, फर्सी सुप, रंगीन म:म, खरायो मासुका बलहरू र प्रसिद्ध चिनियाँ परिकार ‘बुद्धा जम्प्स ओभर द वाल’ को विशेष संस्करण समावेश थियो।
