काठमाडौं । उद्योगीहरूले सिमेन्टको मूल्य प्रतिबोरा ४० रुपैयाँले बढाएका छन् । निर्माण व्यवसायी महासंघका अध्यक्ष रवि सिंहका अनुसार ओपीसी सिमेन्ट ६३० देखि ८०० रुपैयाँ र पीपीसी ५९० देखि ६५० रुपैयाँसम्म पुगेको छ ।
सिमेन्ट उत्पादक संघका अध्यक्ष रघुनन्दन मारुले लोडसेडिङका कारण लागत बढेको भन्दै मूल्य वृद्धि गरिएको बताए ।
यहीबीच, वाणिज्य आपूर्ति तथा उपभोक्ता संरक्षण विभागले मूल्य नियन्त्रण गर्न सिमेन्ट र फलामे छडको अधिकतम खुद्रा मूल्य (एमआरपी) राख्न निर्देशन दिएको छ । विभागका महानिर्देशक कुमारप्रसाद दहालका अनुसार उद्योगीहरूले सात दिनभित्र एमआरपी लागू गर्ने सहमति जनाएका छन् ।
तर, महासंघका अध्यक्ष सिंहले एमआरपीले मूल्यवृद्धि नियन्त्रण नगर्ने बताउँदै उत्पादन बढाउनुपर्ने वा भारतबाट आयात खुला गर्नुपर्ने धारणा राखे । उनका अनुसार नेपाली उपभोक्तालाई महँगो मूल्य तिर्न बाध्य पारिएको छ, जबकि भारतमा सिमेन्ट सस्तो बिक्री भइरहेको छ ।
