२०७२ वैशाख १ गते, मंगलबारको राशिफल

  • जनबोली न्यूज नेटवर्क
  • मङ्गलबार १ ब‌ैशाख, २०७२
Raasifalवि.सं.२०७२ साल वैशाख १ गते। मंगलबार।
इश्वी सन् २०१५ अप्रिल १४ तारिख।
शकसंवत् १९३७। नेपाल संवत् ११३५ चौलागा।
कीलक संवत्सर। उत्तरायण। वसन्त ऋतु।
वैशाख कृष्णपक्ष। तिथि– दशमी, दिउँसो १२:३३ बजेउप्रान्त एकादशी।
नक्षत्र– धनिष्ठा, रात्रि ११:५९ बजेपछि शतभिषा।
योग– शुभ, रात्रि ११:२७ बजेदेखि शुक्ल।
करण– भद्रा, दिउँसो १२:३३ बजेदेखि वव, रात्रि ११:२३ बजेउप्रान्त वालव।
आनन्दादिमा उत्पात योग। चन्द्रराशि– मकर, दिउँसो १२:४६ बजेदेखि कुम्भ।
काठमाडौंमा सूर्योदय– ५:४३ बजे, सूर्यास्त– ६:२७ बजे र दिनमान ३१ घडी ५० पला।
पर्व– नववर्ष २०७२ आरम्भ। वैशाख संक्रान्ति। सपनतीर्थमा स्नान गर्ने दिवस। खायुँ सन्हु। चम्पादेवीमा मेला। तागा संक्रान्ति। भक्तपुरमा विश्वध्वज पातन गर्ने दिवस।

मेष (चु, चे, चो, ला, लि, लु, ले, लो, अ) Aries :
विभिन्न अवसरले पछ्याउनेछन्। कामको सन्दर्भमा विशिष्ट व्यक्तित्वहरूसँग मित्रता बढ्नेछ। कला, साहित्य, मनोरञ्जन आदि क्षेत्रमा रुचि बढ्नेछ। व्यापार–व्यवसायमा लाग्नेहरूलाई विशेष फाइदा होला। रुचिका विषयमा लगानी बढाउने समय छ। भविष्यका लागि विशेष काममा जग बसाउने मौका छ। मध्याह्नपछि आम्दानी बढे पनि खर्चको मात्रा बढ्नेछ।

वृष (इ, उ, ए, ओ, वा, वि, वु, वे, वो) Taurus :
आस मारेको काम बन्नाले उत्साह जाग्नेछ। सानो प्रयत्नले ठूलो काम सम्पादन हुनेछ। एउटै कामबाट दोहोरो लाभ मिल्नेछ। गरेका कामबाट धेरैलाई फाइदा पुग्न सक्छ। सामाजिक काममा रुचि बढ्नेछ। धार्मिक अनुष्ठान र मंगलमय कृत्य सम्पादन हुन सक्छन्। व्यवसायमा पनि प्रशस्तै लाभ हुनेछ। मध्याह्नपछि कीर्तिमानी काम सम्पादन गर्न सकिनेछ।
मिथुन (का, कि, कु, घ, ङ, छ, के, को, हा) Taurus :
काममा केही चुनौती देखिए पनि पूर्वाह्नकालको सदुपयोग हुनेछ। सहयोगीहरूले काममा तत्परता देखाउनेछन्। नसोचेको फाइदा उठाउन सकिनेछ। मध्याह्नपछि प्रयत्न निष्फल जस्तै होला। बन्ने निश्चय भएको काम अचानक बिग्रन सक्छ। प्राप्त न्यून उपलब्धिले मन बुझाउन नसकिएला। आश्वासन दिएर झुक्याउनेहरूले सताउनेछन्, सचेत रहनुहोला।
कर्कट(हि, हु, हे, हो, डा, डि, डु, डे, डो) Cancer :
दाम्पत्य जीवन आनन्दमय बन्नेछ। रमाइला ठाउँको भ्रमण गर्ने मौका आउला। नयाँ सवारी साधन प्राप्तिको योग छ। आतिथ्यपूर्ण सम्मान पाइएला। मित्रता र प्रेमको बन्धन कसिनेछ। मध्याह्नपछि व्यापार–व्यवसायमा सोचेको लाभ नमिल्न सक्छ। यात्रामा पनि विवाद र केही समस्या आउलान्। अलि बाध्यताका काममा जुट्नुपर्ला। आम्दानीको अनुपातमा खर्च बढी गर्नुपर्ला।
सिंह (मा, मि, मु, मे, मो, टा, टि, टु, टे) Leo :
टाढाको यात्रा व्यवस्थापनमा खर्च बढ्नेछ। केही अप्ठ्यारा परिस्थिति पनि सामना गर्नुपर्ला। गरी आएका काम र व्यापार–व्यवसायमा सामान्य फाइदा हुनेछ। अधिकार सुरक्षा गर्न जुट्नुपर्नेछ। शोख पूरा गर्नमा खर्च हुनेछ। मध्याह्नपछि काममा सोचेको लाभ नमिल्न सक्छ। यात्रामा पनि विवाद र केही समस्या आउलान्। तापनि, गरी आएका काममा फाइदै हुनेछ।
कन्या (टो, पा, पि, पु, ष, ण, ठ, पे, पो) Virgo :
अस्वस्थताले काममा ढिलासुस्ती हुन सक्छ। अप्रिय समाचारले दुःखी बनाउला। पढाइलेखाइमा पनि प्रगति गर्न नसएला। योजना कार्यान्वयनमा ल्याउन मुस्किल पर्नेछ। आफूलाई कमजोर भएको अनुभूति हुनेछ। तापनि निराश नहुनुहोस्, मध्याह्नपछि स्थितिमा सुधार आउला। प्रतिष्ठित काम सुरु गर्ने मौका छ। प्रतिस्पर्धा गरेरै अधिकार स्थापित गर्न सकिनेछ।
तुला (रा, रि, रु, रे, रो, ता, ति, तु, ते) Libra :
सामाजिक काममा फाइदा होला। घर–गृहस्थीमा भने समस्या आउन सक्छ। परिवारजनसँग असमझदारी बढ्नुका साथै मान्यजनको सुझाव अप्रिय लाग्न सक्छ। महत्वाकांक्षी योजना गोप्य राखेर अघि बढ्दा फाइदा हुनेछ। मातृधनको उपयोगबाट लाभ उठाउन सकिनेछ। पशुधन र जमिनबाट पनि लाभ होला। मध्याह्नपछि अरूको भर पर्दा धोका हुन सक्छ, सचेत रहनुहोला।
वृश्चिक (तो, ना, नि, नु, ने, नो, या, यि, यु) Scorpio :
मनग्ये धनलाभ हुनेछ। साथीभाइले पनि राम्रै सहयोग जुटाउनेछन्। नयाँ काम सुरु गर्ने मौका छ। विशेषगरी नयाँ उद्योग वा रचनात्मक काममा जुट्ने समय आएको छ। परिश्रमअनुसार उपलब्धि पनि राम्रै पाइएला। मध्याह्नपछि भने विश्वासपात्रले धोका दिन सक्छन्। परिवारजनमा असमझदारी बढ्ने, झमेलामा परिने र काम रोकिने सम्भावना छ, सचेत रहनुहोला।
धनु (ये, यो, भा, भि, भु, धा, फा, ढा, भे) Sagittarius :
आजका योजना पूर्ण कार्यान्वयन नहुन सक्छन्। व्यावसायिक काममा अवरोध आउने देखिन्छ। खर्चको मात्रा बढ्ने र आर्थिक अभावले सताउने योग छ। बोलीको गलत अर्थ लाग्ने वा तपाईंको अभिव्यक्तिबाट विवाद उत्पन्न हुने सम्भावना छ, सचेत रहनुहोला। मध्याह्नपछि स्थितिमा सुधार आउला। साथीभाइको सहयोग र विगतको श्रमबाट भने राम्रै लाभ होला।
मकर (भो,जा,जि,जु,जे,जो,ख,खि,खु,खे,खो,गा,गि) Capricorn :
विभिन्न अवसरले पछ्याउनेछन्। काममा प्रतिष्ठा मिल्नेछ। आत्म–विश्वास बढ्नेछ। विशिष्ट व्यक्तित्वसँग भेटघाट हुनेछ। पारिवारिक जमघटमा मन रमाउनेछ। मन पर्ने वस्त्र, अलंकार आदि उपहार पाइएला। स्वादिष्ट भोजनको आनन्द मिल्नेछ। तर, स्वास्थ्यका लागि खानपानमा सचेत रहनुपर्ने बेला छ। पठनपाठनमा प्रगति हुनेछ। विलासितामा खर्च बढ्ने समय छ।
कुम्भ (गु, गे, गो, सा, सि, सु, से, सो, दा) Aquarius :
वैदेशिक क्षेत्रबाट लाभ लिने मौका छ। स्थान परिवर्तन हुनेछ। टाढाको यात्रा सम्भावना छ। प्रतिस्पर्धाबाट फाइदा उठाउन सकिनेछ। तर, काममा केही चुनौती आइलाग्लान्। मध्याह्नपछि विशिष्ट व्यक्तित्वसँग भेटघाट हुनेछ। पारिवारिक जमघटमा मन रमाउनेछ। कामबाट फुर्सद पनि मिल्नेछ। मन पर्ने वस्तु उपहार पाइएला। स्वादिष्ट भोजनमा रमाउने मौका छ।
मीन (दि, दु, थ, झ, ञ, दे, दो, चा, चि) Pisces :
लामो समयदेखि रोकिएको काम बन्नुका साथै आम्दानीको स्रोत समेत बढ्नेछ। पारिवारिक आवश्यकता पूर्ति होला। श्रमको उचित मूल्यांकन हुनेछ। व्यावसायिक काममा राम्रै फड्को मार्न सकिनेछ। साझेदारी र सट्टापट्टामा विशेष लाभ मिल्नेछ। मध्याह्नपछि भने विश्वासपात्रले धोका दिन सक्छन्। घरपरिवारमा असमझदारी बढ्ने र काम रोकिने सम्भावना छ।

राशिफलका सम्बन्धमा—

यो ब्रह्माण्डको सृष्टि पृथ्वी, जल, तेज, वायु र आकाश मिलेर भएको हो। सम्पूर्ण चराचरजगत् पञ्चमहाभूतमय हुन्छ। मानव शरीर पनि पञ्चमहाभूतले नै बनेको हो। आकाशमा रहेका नवग्रहले यिनै पञ्चमहाभूतको प्रतिनिधित्व गर्दछन्। वेदमा सूर्यलाई आत्मा र चन्द्रमालाई मन भनिएको छ। यस्तै, मंगलमा तेज, बुधमा पृथ्वी, बृहस्पतिमा आकाश, शुक्रमा जल र शनिमा वायुको गुण अन्तर्निहित हुन्छ।

शब्द, स्पर्श, रूप, रस, गन्ध पञ्चमहाभूतका विषय हुन्। यी विषयहरू मानिसका पाँच ज्ञानेन्द्रियले ग्रहण गर्दछन्। मानिसका हरेक इन्द्रिय आफ्नो विषयसुखका लागि लालायित हुन्छन्। आफ्नो विषयभोगका लागि ग्रहले मानिसको सम्बद्ध इन्द्रियलाई क्रियाशील बनाइदिन्छ। इन्द्रियको मागबाट मन प्रभावित हुन्छ। यसर्थ मन लाग्नु नै निश्चित कामको आधार बन्नु हो। मनले काम गर्न आत्माबाट स्वीकृति लिने गर्दछ। आत्माद्वारा स्वीकृत काम र विषयका लागि मनले इन्द्रिय र विषयहरू सञ्चालन गर्दछ।

मनको कारक चन्द्रमा हो। मानिसको नामराशि नै जन्मसमयमा चन्द्रमा बसेको स्थान हो। चन्द्रराशिबाट गतिशील ग्रहहरू जुन–जुन अवस्थामा देखिन्छन् सोही अनुसार मानिसको रुचि, व्यवहार, स्वास्थ्य, परिस्थिति आदिमा परिवर्तन हुन्छ। मन अर्थात् चन्द्रमाको इच्छाशक्ति र आत्मा अर्थात् सूर्यको विवेक शक्ति कार्यसम्पादनका विशेष कारक हुन्। इन्द्रियका सूचक ग्रहहरूले विभिन्न परिस्थिति सिर्जना गर्दछन्।

मानव जीवन यिनै परिस्थितिले जेलिएको हुन्छ। जन्म, मृत्युदेखि जीवनमा आइपर्ने यावत् उन्नति–अवनति, सुख–दुःख, मित्र–शत्रु, ऐश्वर्य, अभाव, दरिद्रता, रोग, राज्य, मान-सम्मान, सन्तान, परिवारलगायत उसका सबै निर्दिष्ट कर्मबन्धनलाई ग्रहहरूले परिचालन गर्दछन्। यसर्थ भनिएको छ—

‘ग्रहाः राज्यं प्रयच्छन्ति ग्रहाः राज्यं हरन्ति च।
ग्रहैर्व्याप्तमिदं सर्वं त्रैलोक्यं सचराचरम्।।’

राशि आकाशमण्डलको निश्चित क्षेत्र हो। यी क्षेत्रमा बसेका ग्रहले मानवजीवनलाई कसरी प्रभाव पार्दछन् भन्ने अध्ययन गोचरअनुसार गरिन्छ। यहाँ प्रस्तुत राशिफल शास्त्रोक्त मतका आधारमा तयार पारिएको हो। खासगरी ग्रहहरूको विभिन्न राशिगत स्थिति, दैनिक गतिलगायत परिस्थितिजन्य बल, अन्य ग्रहहरूको वेध–प्रतिवेध, शुभ–पाप दृष्टि र प्रभावको मूल्याङ्कन गरी मुख्यरूपमा बृहत्संहिता, मुहूर्तचिन्तामणि, मुहूर्तमार्तण्ड, फलदीपिका, जातकपारिजात, बृहद्दैवज्ञरञ्जनम् जस्ता आधिकारिक ग्रन्थहरूको निष्कर्षअनुसार शास्त्रीयरूपमै राशिफललाई विश्वसनीय बनाउने प्रयास गरिएको छ।

सम्बन्धित खबरहरु

एकैदिन ९ जना मृत अवस्थामा फेला
  • शनिवार १० असोज, २०७७
दुर्घटनामा चार जनाको मृत्यु
  • शनिवार १० असोज, २०७७