काठमाडौ । आज राति अर्थात अक्टोबर २१, २०१८, नेपाली बिक्रम सम्वत २०७५ कात्तिक ४ गते राति ३२ वर्षपछि हेलीको पुछ्रेताराका कारण हुने मृघशिरा उल्का वर्षा हुँदैछ । यो क्रम पर्सी सोमबार बिहानसम्म चल्नेछ । नेपाल एस्ट्रानोमिकल सोसाइटीकाअनुसार ती उल्का वर्षाको स्रोत ओरायन (मृघशिरा) तारामण्डलमा भएको जस्तो देखिने हुनाले यसलाई ओरियनिड मिटियर सावर वा मृघशिरा उल्का वर्षा नाम दिइएको हो ।

उल्का वर्षा स्थानीय समय अनुसार अक्टोबर २१ राति १०ः४५ देखि नै शुरु भई अक्टोबर २२ बिहान ५ः४५ बजे सम्म देख्न सकिने भएता पनि उल्का वर्षा हेर्नको लागि ३ः४५ पछिको समय उत्तम हुने सोसाइटीले जनाएको छ । अत्याधिक उल्का वर्षाको बेला प्रति घण्टा २० सम्म उल्का देखिने सोसाइटीका अध्यक्ष सुरेश भट्टराईले जानकारी दिएका छन् । ती उल्का वर्षाहरुको गति प्रति सेकेण्ड ६७ किमिसम्म हुने भएकोले करिब ७० किमि माथि वायुमण्डलमा घर्षण पैदा भई यस्तो दृष्य देखिने देखिन्छ ।

के हो उल्का वर्षा ?
पुछ्रेताराले सूर्यको परिक्रमा गर्ने क्रममा सूर्यको नजिक आइपुग्दा आफ्नो कक्षमा धुलोका कण र चट्टानहरु छोड्ने गर्दछ । जब पृथ्वीले सूर्यको परिक्रमा गर्ने क्रममा पुछ्रेताराको उक्त कक्षको नजिक आइपुग्छ, तब ती धुलोका कणहरु र चट्टानहरु पृथ्वीको वायुमण्डलमा तीब्र गतिले ठोक्किएर जल्दछन् । यसैलाई उल्का वर्षा भनिन्छ । उल्का वर्षालाई नेपाली जनजिब्रोमा ‘तारा खसेको’ पनि भनिन्छ ।

के हो हेलीको पुछ्रेतारा ?
बेलायती खगोलशास्त्री ‘एडमण्ड हेली’ ले न्युटनको गुरुत्वाकर्षण सम्बन्धि साध्यको माध्यमले सौर्य मण्डलका आकाशीय पिण्डहरुको अध्ययन गर्ने क्रममा सन् १७५८ को क्रिसमसको रात यो पुछ्रेतारा पत्ता लगाएको हुनाले यसलाई ‘हेलीको पुछ्रेतारा’ भनिएको हो । यो एक नियमित पुछ्रेतारा हो, जसले हरेक ७५ बर्षमा सूर्यलाई परिक्रमा गर्दछ ।

के छ खतरा ?
पहिले–पहिले सुचनाको विकास राम्रोसँग नहुँदा रेडियोहरुले पुछ्रेतारा ठोकिएर कणहरु पृथ्वीमा खस्दै भन्ने समाचार बज्दा गाँउ बस्तिमा खुबै त्रास हुन्थ्यो । मानिसहरु घर छोडेर खुल्ला ठाँउमा बस्ने गर्दथे । तर यो एक खगोलिय प्रक्रिया हो । यसले कुनै खतरा ननिम्त्याउँने बैज्ञानिकहरुको दावी छ । धुलाका कँणहरु माथि बायुमण्डलमै विलिन भइसक्ने भएकाले पृथ्वीमा यसले कुनै असर नगर्ने उनीहरुको स्पष्टोक्ति छ ।

सम्बन्धित खबरहरु