काठमाडौं, कात्तिक २८ । सूचना–प्रविधिको उत्कृष्ट प्रयोग गरी कार्य गरेबापत सरकारी संस्थालाई दिइने “डिजिटल गभर्नमेन्ट अवार्ड” नेपाल प्रहरीले प्राप्त गरेको छ । जापानस्थित एसियन–ओसिएनियन कम्युटिङ इन्डस्ट्री अर्गनाइजेसनद्वारा प्रदान गरिने “एसोसीओ डिजिटल गभर्नमेन्ट अवार्ड–२०१८” प्राप्त गरेको नेपाल प्रहरीका प्रवक्ता उत्तमराज सुवेदीले जानकारी दिए ।

जापानको टोकियोमा कात्तिक २२ गते भएको एसोसीओ समिटमा कम्प्युटर एसोसिएसन नेपाल महासंघका कार्यकारी सदस्य डा. अभिजित गुप्ताले ग्रहण गरेको उक्त अवार्ड बुधबार प्रहरी प्रधान कार्यालयमा आयोजित एक कार्यक्रममा प्रहरी महानिरीक्षक सर्वेन्द्र खनाललाई हस्तान्तरण गरे ।

संस्थाले एसोसीओ आउटस्टयान्डिङ कम्पनी, आउटस्टयान्डिङ युजर अर्गनाइजेसन, डिजिटल गभर्नमेन्ट र आइसीटी एजुकेसन गरी चार विधामा अवार्ड वितरण गर्ने गर्छ । त्यसमध्ये नेपाल प्रहरीले सूचना–प्रविधि क्षेत्रको महत्वपूर्ण अवार्ड प्राप्त गरेको हो । सदस्य राष्ट्रबीच आइसीटी इन्डस्ट्रीलाई प्रवर्धन गर्दै आपसी तथा व्यापारिक सम्बन्ध बलियो बनाउने उद्देश्यले जापानमा सन् १९८४ मा उक्त संस्था स्थापना भएको हो ।

संस्थामा एसिया र ओसिएनियाका २४ देशका सूचना–प्रविधिसँग सम्बन्धित १० हजारभन्दा बढी संस्था आवद्ध छन् । यसअघि, २०७५ भदौ १ गते नेपाल प्रहरीले डिजिटल “गभर्नेन्स अवार्ड–२०१८” प्राप्त गर्न सफल भएको थियो । सूचना–प्रविधिको उच्चतम् प्रयोग गरेको आधारमा नेपाल प्रहरीले उक्त अवार्ड प्राप्त गरेको हो । रासस

सम्बन्धित खबरहरु