जनबोली न्यूज नेटवर्क
काठमाण्डौं । मुलुकको शान्ति सुरक्षा कायम गर्न अर्ध सैनिक बलकारूपमा स्थापना भएको सशस्त्र प्रहरी बलमा पछिल्ला दिनमा भ्रष्टाचार डरलाग्दो गरी मौलाईरहेको छ । समाचारअनुसार एक वर्षअघि गरिएको बोलपत्र आह्वान अनुरुपका मालसमान ठेकेदारबाट बुझि भण्डारण गर्ने प्रक्रियामा यसरी भ्रष्टाचार भईरहेको बताइएको छ । सशस्त्र प्रहरी बलले गत वर्ष माघ ५ गते गोरखापत्रमा आफूलाई आवश्यक समाग्री खरीदका लागि वोलपत्र माग गरेको थियो । विभिन्न १६ प्रकारका समान खरिदका लागि गरिएको बोलपत्रमा प्रतिस्पर्धामार्फत नौ वटा कम्पनीले ठेक्का अनुमति पाएका थिए । त्यसरी ठेक्का पाएका फर्महरूबाट तयार गरिएका समाग्रीहरूको परीक्षणमापनका क्रममा सशस्त्रका अधिकारी र गुणस्तर तथा नापतौल बिभागका कर्मचारीले मिलेमतो गरी भ्रष्टाचार गरेको बताइएको छ ।
उक्त बोलपत्रमा कम्ब्याक्ट ड्रेस चुस्ता प्रतिजोर २१ सय ९७ का दरले ४० हजार थान खरिदका लागि समृद्धि ट्रेड इन्टरनेशनलसहितलाई, १८ सय १० का दरले ३५ हजार जोर बुट र ८ सय ४७ का दरले उनी गञ्जी र कट्टु ३७ हजार जोर खरिदका लागि जयसलिना ईन्टरप्राईजेजलाई अनुमति दिईएको थियो । त्यसैगरी रुक्स्याक व्याग १९ सय ३० प्रति थानका दरले १० हजार र एक थानको १५ सय १० रुपैंया ५० पैसाका दरले ५५ सय थान स्लिपिङ व्याग खरिदका लागि आयुषा व्याग उद्योगलाई, प्रति थान ४ सय ५० का दरले ३७ हजार थान झुल खरिदका लागि स्प्रिङ इन्टरनेशनल प्रालिलाई, २ सय ७० प्रतिथानका दरले ३५ हजार थान व्यारेट क्याप खरीद गर्न एशियन इन्टरनेशनल बिजनेशलाई, ११ सय ४० प्रतिथानका दरले १६ सय जोर टपबुट खरिदका लागि क्रोनवाल बिजनेश ट्रेडसलाई अनुमति दिईएको थियो । त्यस्तै ३ सय ५१ प्रति मिटरका दरले २८ हजार मिटर टेरिकटनको पाईन्ट कपडा खरिद गर्न प्लस प्वाईन्ट टे«डिङलाई ९ सय ९३ प्रति थानका दरले ७ हजार थान जर्सी, १ सय ९१ प्रति मिटरका दरले ३५ हजार मिटर टेरिकटन सर्ट र ९ सय ९३ प्रति मिटरका दरले उलन पाईन्ट कपडा खरिदका लागि क्राउन टेक्सटाईल्सलाई जिम्मा दिएको थियो ।
यता ५ सय ८९ प्रतिमिटरका दरले ३५ हजार मिटर उलन सर्ट, ४ हजार ४ सय ९० प्रति जोरका दरले दुई हजार जोर स्नो बुट, चार हजार ६ सय ८५ प्रति थानका दरले दुई हजार थान स्नो पार्कर ज्याकेट, प्रतिथान ५ हजार दुई सयका दरले दुई हजार थान स्नो स्लिपिङ व्याग खरिदका लागि क्यामोफ्ल्याग नेपाल ट्रेडिङले अनुमति पाएका थिए । गत बर्षको फागुण १६ गते सामान आपुर्ति गर्नको लागि आशय पाएका ती फर्म तथा व्यवसायीहरुसँग सशस्त्र प्रहरीका महानिरिक्षक शैलेन्द्र खनाललगायतका उनि निकटस्थ उच्च अधिकारीहरुले मिलेमतो गरी ठुलो घोटाला गरिरहेको समाचारस्रोतको दावी छ । ती सामानको यसअघि बिदेशका ल्यावमा गुणस्तर मापन परिक्षण गर्ने गरिएकोमा यसपटक नेपाल सरकारकै गुणस्तर तथा नापतौल बिभागमा समेत ठुलो चलखेल गरी गुणस्तर मापन पास गराइएको बताइएको छ । गुणस्तर मापनका लागि बिभागका महानिर्देशक बिश्वबाबु पुडासैनी तथा प्राविधिक अधिकृत सुशिल शाह, किरण सुवेदी तथा ठेकेदार ज्ञानेन्द्र बस्नेतले ठुलो चलखेल गरेका थिए ।
करीब ६० करोड मुल्य बराबरका १६ प्रकारका सामान गुणस्तर मापनमा पास गराई भण्डारण गर्दा ठुलो धनराशी कमिशन हात लागि हुने भएकोले शसस्त्र महानिरिक्षक खनाल र गुणस्तरका महानिर्देक पुडासैनीले मिलेमतोमा पास गराइरहेको बताइएको छ । यसमा शसस्त्रकै कल्याण हेर्दै हाल बजेटमा पुगेर्का डिएसपी पुर्ण साउद र लेखा अधिकृत गणेश मल्लले लाईन मिलाएको समाचारस्रोत बताउँछ । यसरी सामान गुणस्तर परिक्षणका क्रममा केहि सामान परिक्षण पास गराई त्यही लटमा झट्ट हेर्दा दुरुस्तै देखिने कमसल सामान हालेर भण्डारण गर्ने गरिएको समाचारस्रोतले बतायो । यसबारेमा अख्तियार दुरुपयोग दुरुपयोग अनुसन्धान आयोग, राष्ट्रिय सर्तकता केन्द्रले सशस्त्रको भण्डारण शाखामा छानवीन गर्ने हो भने सत्य, तथ्य हात लाग्छ, ‘समाचारस्रोत भन्छ– हामीले अख्तियार तथा सर्तकता केन्द्र गुहारेका छौं ।’