जनबोली न्यूज नेटवर्क
काठमाडौ । प्रतिबन्धित नेत्रविक्रम चन्द ‘विप्लव’ नेतृत्वको नेकपा माओवादीका पोलिटव्यूरो सदस्य पदम राईसहितका नेताहरु आज सत्तारुढ नेकपामा प्रवेश गरेका छन् । नेकपामा प्रवेश गरेका राईसहितका नेता कार्यकर्तालाई आइतबार नेकपा अध्यक्ष पुष्पकमल दाहाल प्रचण्डले टीका लगाएर स्वागत गर्नुभएको छ ।
कार्यक्रममा अध्यक्ष प्रचण्डले आफैले जन्माएको हुर्काएको छोरो बेपत्ता भएपछि साँझ टुप्लुक्क घर आउँदा आमा जति खुशी हुन्छिन् म त्यति नै खुशी भए । आज पदम जी मात्र हैन विप्लव जीपनि हामीसँग आउँनुहुन्छ । संसारको बलियो कम्युनिष्ट बनाउन सहयोग गर्नुहुनेछ ।
को हुन् पदम राई ?
भोजपुरको बोया घर भएका राई जनयुद्धकाल अघिदेखि नै माओवादीमा संगठित थिए । पहिलो संविधानसभा निर्वाचनमा भोजपुर क्षेत्र नम्बर १ बाट प्रत्यक्ष चुनाव जितेर उनी भौतिक योजना तथा निर्माण राज्यमन्त्रीसमेत बनेका थिए ।
एकीकृत नेकपा माओवादी विभाजन भएपछि उनी मोहन वैद्य नेतृत्वको तत्कालीन नेकपा माओवादीमा लागेका थिए । वैद्यको पार्टी पनि फुटेपछि उनी विप्लव समूहमा लागेका थिए ।
गत निर्वाचनमा हाल प्रदेश १ का मुख्यमन्त्री शेरधन राईलाई बम प्रहार गरेको आरोपमा प्रहरीले पक्राउसमेत गरेको थियो । तर, अदालतको आदेशमा उनी रिहा भए ।
राई विप्लव समूहका जनसरकार उपप्रमुखको जिम्मेवारीमा समेत थिए । जेठ १५ गते गणतन्त्र दिवसको दिन संविधानसभा पदक वितरण समारोहमा उनी सहभागी भएका थिए ।
उनी सत्तारुढ निकपाका नेताहरुसँग निरन्तर सम्पर्कमा थिए । यहीबीचमा उनले एक सञ्चार माध्यममा सरकारसँग वार्ता जारी रहेको र त्यो सकारात्मक ढंगले अघि बढेको प्रतिक्रिया दिएका थिए । त्यसपछि पार्टी नीतिविपरीत बोलिएको भन्दै उनलाई निलम्बन गरिएको थियो ।