जनबोली न्यूज नेटवर्क
काठमाडौं । एकै दिनमा सर्वाधिक कोरोना संक्रमित फेला परेपछि नेपालगन्जमा भोलिदेखि कर्फ्यु लागु हुने भएको छ । सोमबार (आज) दिउँसो जिल्ला प्रशासन कार्यालयमा बसेको सर्वदलीय र सर्वपक्षीय बैठकले मंगलबार बिहान ११ बजेदेखि वैशाख २५ गतेसम्म नेपालगञ्जलाई पूर्णतः निषेधित क्षेत्र घोषणा गर्ने निर्णय गरेको हो । संघीय सरकारले जारी राखेको लकडाउनसँगै नेपालगन्ज उपमहानगरपालिकामा वैशाख २३ गते बिहान ११ बजेदेखि २५ गते मध्यरातिसम्म पूर्ण निषेधित क्षेत्र लागु गरिनेछ ।
आइतबार एकैदिनमा १५ जना कोरोना संक्रमित भेटिएसँग सुरक्षा व्यवस्था कप कडा पारिएको हो । कर्फ्युको समयमा नेपालगन्जमा औषधि पसलबाहेक सबैखाले पसल, व्यवसाय खोल्न पाइनेछैन । भारतसँग सीमा जोडिएको बाँकेमा १६ जना कोरोना संक्रमित भएका छन् । छिमेकी जिल्लामा कोरोना संकट बढ्दै गएपछि कर्णाली प्रदेशमा पनि त्रास बढेको छ । नेपालगञ्जको अन्सारी मस्जिदका ६० वर्षीय मौलानामा वैशाख १९ गते कोरोना संक्रमण देखिएको थियो ।
त्यसको दुई दिनपछि उनीसँग सम्पर्कमा रहेका १५ जनामा पनि कोरोना संक्रमणको पुष्टी भएको हो । छिमेकी प्रदेश सुदूरपश्चिम र प्रदेश ५ मा कोरोना संक्रमण देखिएपछि कर्णाली प्रदेश ७ दिनको लागि सिल गर्ने निर्णय भएको छ । सोमबार मुख्यमन्त्री महेन्द्रबहादुर शाहीको अध्यक्षतामा बसेको प्रदेश विपद् व्यवस्थापन परिषद्को बैठकले यस्तो निर्णय गरेको हो ।