काठमाडौं । कोरोना महामारीलाई रोक्न बेसारको उपयोगबारे चर्चा गर्नुभएका प्रधानमन्त्री केपी शर्मा ओलीले त्यसबारे गलत्त भ्रम फैलाएको आरोप लगाउनु भएको छ । उहाँले दैनिक प्रयोग हुने खाद्यवस्तुको महत्व नबुझेर केही विद्धानले बेसारको मजाक उडाएको भन्दै दुःख व्यक्त गर्नुभएको छ । औषधिको रुपमा बेसारलगायत सामग्री खानेकुराको रुपमा पूर्खाहरुले प्रयोग गर्दै आएको उहाँले स्पष्ट पार्नुभयो ।
विश्व योग दिवसको अवसारमा आइतबार बिहान भर्चुअल कार्यक्रममा राष्ट्रिय योग अभ्यासक्रम (प्रोटोकल) पुस्तिका सार्वजनिक गर्दै ओलीले केही विद्धानहरुले पूर्वजको ज्ञानलाई मजाक बनाएको भन्दै असन्तुष्टि व्यक्त गर्नुभएको हो । उहाँले भन्नुभयो, ‘आहारा, व्यायम र आरामको सन्तुलन मिलाए मात्र स्वस्थ्य रहन सकिन्छ,’ उनले भने, ‘मैले बेसारले रोग प्रतिरोधात्मक क्षमता बढाउन सहयोग गर्छ भन्दा केही विद्धानले बेसार अदुवालाई मजाक बनाए ।’
पूर्वजहरुले औषधिको रुपमा भान्सामा ती खानेकुराको प्रयोग गरेको उहाँको दावी छ । उहाँले थप भन्नुभयो, ‘मेथी किन पड्काएको ? सब्जीमा बेसार किन हालेको ? भनेर ती विद्धानले भान्सा तयार गर्नेलाई सोधुन्, त्यसले शरीरको प्रतिरोधी क्षमता बढाउँछ ।’ त्यसको महत्व नबुझेर पुर्खाको समेत अपमान गरेको आरोप लगाउनु भएको छ ।
प्रधानमन्त्री ओलीले आहार, व्यायम र आरामको सन्तुलन मिलाउन सबैलाई आग्रह समेत गर्नुभयो । प्रधानमन्त्रीका अनुसार विरुवालाई पानी चाहिन्छ, धेरै पानी भयो भने विरुवा पनि राम्रो हुँदैन । शारीरिक र मानसिक हिसाबले सचेत र सबल रहन पहिले स्वस्थ्य रहनुपर्ने हुन्छ । उहाँले प्राचीनकालदेखि योग र आयुर्वेद नेपाली समाजमा रहेको उल्लेख गर्नुभयो ।
कस्तो बेला कुन प्रकारको योग आवश्यक हुन्छ भनेर गुरुहरुबाट सिक्नुपर्ने पनि उहाँले स्पष्ट पार्नुभयो । सबै उमेरका जुनसुकै व्यक्तिलाई योगको आवश्यक पर्ने उहाँको बुझाई रहेको छ । शिक्षा, विज्ञान तथा प्रविधि मन्त्रालयले योग अभ्यास क्रमको पुस्तिका तयार पारेको हो । छैठौं अन्तराष्ट्रिय योग दिवसको अवसरमा प्रधानमन्त्री ओलीले पुस्तिका सार्वजनिक गर्नुभएको हो ।