जनबोली न्यूज नेटवर्क
काठमाडौ । महोत्तरीमा आइतबार साँझदेखि हराइरहेकी बालिकाको लाश फेला परेको छ । जिल्लाको बर्दिवास नगरपालिका–१४ का शहीद आलमकी छ वर्षीया छोरी गुलाव साह खातुनको लाश प्रहरीले सोमबार मध्यराति फेला पारेको हो । घरआँगन वरपर नै खेलिरहेकी खातुन आइतबार साँझ अचानक हराएपछि परिवारजन र प्रहरीले उनको खोजी गरिरहेको थियो ।
बालिकाको लाश बर्दिवास–१४ कै शुभम बस्ती नजिकको झाडीमा बोरामा खाँदेको अवस्थामा फेला परेको इलाका प्रहरी कार्यालय बर्दिवासले जनाएको छ । बर्दिवास–१४ को शुभम बस्तीस्थित सामुदायिक परिवार कल्याण सङ्घको कार्यालयभन्दा पश्चिम बिकरु साहको घर पछाडिको विनोद साहको खाली जग्गामा खातुनको लाश भेटिएको इलाका प्रहरी कार्यालय बर्दिवासका प्रहरी नायब उपरीक्षक राजन चापागाईँले जानकारी दिनुभयो ।
बालिकाको नियोजित ज्यान सम्बन्धि उद्योग गरेको आशङ्कामा प्रहरीले जिल्लाकै गौशाला नगरपालिका–५ का २५ वर्षीय अरुणकुमार साहलाई पक्राउ गरेको छ । पक्राउ गरिएका साहले प्रारम्भिक सोधपुछमै खातुनको ज्यान सम्बन्धि उद्योग गरेको स्वीकार गरेका प्रहरी नायब उपरीक्षक चापागाईँले बताउनुभयो ।
घटना प्रकृति हेर्दा बा'लि'का'लाई क'र'णीपछि ज्या'न स'म्बन्धि उद्योग भएको स्थानीयवासीले बताएका छन् । प्रहरीले भने लाश परीक्षणपछि थप कुरा खुल्दै जाने जनाएको छ । लाश परीक्षणका लागि प्रादेशिक अस्पताल पठाइएको र घटनास्थललाई घेरा हालेर प्रमाण सुरक्षित राखिएको प्रहरी नायब उपरीक्षक चापागाईँको भनाइ छ ।