जनबोली न्यूज नेटवर्क
काठमाडौं । आज काठमाडौं उपत्यकामा सत्तारुढ नेकपा प्रचण्ड–नेपाल पक्षले प्रदर्शन गर्न लागेको छ । प्रतिनिधिसभा विघटनको विरोधमा दाहाल–नेपाल समूहले आज काठमाडौंमा विरोध प्रदर्शन गर्ने भएको हो ।
एक लाख कार्यकर्ता उतार्ने लक्ष्यसहित यो समुहले विशाल शक्ति प्रदर्शन भनेको आजको कार्यक्रममा उपत्यका र आसपासका जिल्लाहरुबाट समेत कार्यकर्ता उतार्ने तयारी गरेको जानकारी दिएको छ ।
प्रतिनिधिसभा विघटनको निर्णय खारेज गराउँदै संसद् पुनःस्थापना गराउन संघर्षका कार्यक्रम जारी राखिने प्रवक्ता तथा केन्द्रीय संघर्ष समितिका संयोजक नारायणकाजी श्रेष्ठले जानकारी दिनुभयो ।
काठमाडौंको माइतीघर, डिल्लीबजार, लैनचौर, त्रिपुरेश्वर, कुपन्डोललगायत विभिन्न ९ ठाउँबाट निस्कने जुलुस रत्नपार्क पुगेपछि विरोध सभामा परिणत हुनेछ । सभालाई अध्यक्षद्वय पुष्पकमल दाहाल र माधवकुमार नेपाल लगायतका नेताहरुले सम्बोधन गर्ने कार्यक्रम छ ।