काठमाडौ । संसद विघटनसम्बन्धी रिटमा अब भोलिदेखि सरकारको पक्षका कानुन व्यबसायीहरुले बहस गर्नुहुने भएको छ । आइतबारसम्म रिट निवेदकतर्फको बहस सकिएसँगै अब सरकारको पक्षमा बहस हुने भएको हो । आइतबार रिट निवेदकहरुले बहस गरेर सकेपछि अब विपक्षीको बहस सोमबारदेखि सुरु हुने सर्वोच्च अदालतले जनाएको छ ।

संवैधानिक इजलासको नेतृत्व गरिरहनुभएका प्रधानन्यायाधीश चोलेन्द्रशम्शेर जबराले सोमबारदेखि विपक्षीको तर्फबाट बहस सुरु हुने जानकारी गराउनुभएको छ । संसद विघटनसम्बन्धी दर्ता भएका १३ वटा रिटमा प्रधानमन्त्री तथा मन्त्रिपरिषद कार्यालय, राष्ट्रपति कार्यालय र सभामुख अग्निप्रसाद सापकोटालाई विपक्षी बनाइएको छ ।

प्रधानमन्त्री तथा मन्त्रिपरिषद कार्यालय र राष्ट्रपतिको कार्यालयका तर्फबाट महान्यायाधिवक्ता कार्यालयले बहस गर्नेछ । त्यस्तै प्रधानमन्त्री केपी शर्मा ओलीको प्रतिरक्षाका लागि बहस गर्न निजी कानुन व्यवसायीहरुले पनि नाम लेखाउनुभएको छ । सभामुखको तर्फबाट पनि निजी कानुन व्यवसायीले बहस गर्नुहुनेछ ।

गत पुस ५ गते सरकारले संसद विघटन गरेपछि त्यसविरुद्ध सर्वोच्च अदालतमा १३ वटा रिट निवेदन परेका थिए । उक्त संसद विघटन संवैधानिक वा असंवैधानिक भन्ने विषयमा केन्द्रित भएर माघ ४ गतेदेखि रिट निवेदकहरुले बहस सुरु गरिरहनुभएको थियो ।

 

सम्बन्धित खबरहरु