जनबोली न्यूज नेटवर्क
काठमाडौ । सरकारले आजबाट अर्को चरणको कोरोना खोप वितरण कार्यक्रम सञ्चालन गर्दैछ । यो चरणमा सरकारी कर्मचारी र स्थानीय जनप्रतिनिधिहरुलाई कोरोना खोप दिइनेछ ।
स्वास्थ्य तथा जनसंख्या मन्त्रालयले फागुन २ गतेबाट ८ गतेसम्म जिल्लास्थित सबै सरकारी कार्यालयका कर्मचारी, सार्वजनिक संस्थान तथा बैंकका कर्मचारी, स्थानीय पत्रकार र स्थानीय तहका निर्वाचित जनप्रतिनिधिहरुलाई खोप दिइरहेको छ ।
यसका लागि स्थानीय तहकै अस्पतालमा खोप केन्द्र बनाइएको छ । स्वास्थ्य मन्त्रालयका प्रवक्ता डा. जागेश्वर गौतमका अनुसार पहिलो प्राथमिकतामा परेका तर लगाउन छुटेकाहरुलाई पनि यसै चरणमा खोप दिइदैछ । कोही छुटेको भए लगाउँन मन्त्रालयले अपिल गरेको छ ।
सरकारले पहिलो प्राथमिकतामा स्वास्थ्यकर्मी, सुरक्षाकर्मी, स्वास्थ्य स्वयंसेवक, एम्बुलेन्स चालक, सीमा सुरक्षामा खटिएकाहरुलाई खोप उपलब्ध गराएको थियो । त्यसपछि काठमाडौमा रहेका पत्रकारहरुलाई दिइयो ।
स्वास्थ्य मन्त्रालयले काठमाडौंका १२ अस्पतालमा खोप केन्द्र तोकेको छ । वीर अस्पताल, सिभिल अस्पताल मिनभवन, टेकु अस्पताल, त्रिवि शिक्षण अस्पताल महाराजगञ्ज, प्रसूति गृह थापाथली, राष्ट्रिय आयुर्वेद अनुसन्धान तथा तालिम केन्द्र कीर्तिपुर, सशस्त्र प्रहरी अस्पताल बलम्बु, वीरेन्द्र सैनिक अस्पताल छाउनी, नेपाल प्रहरी अस्पताल लाजिम्पाट, शहीद गंगालाल अस्पताल बाँसबारी, नेपाल मेडिकल कलेज अत्तरखेल जोरपाटी र काठमाडौं मेडिकल कलेज सिनामंगलमा खोप केन्द्र तोकिएको हो ।
खोप लगाउन जाँदा आफ्नो कार्यालयको परिचय पत्र साथमै लिएर जानुपर्ने मन्त्रालयले जनाएको छ । देशभरीपनि स्थानीय तहमा रहेको स्वास्थ्य संस्थामा खोप केन्द्र बनाइएको छ । नेपाल सरकारले माघ १४ गतेबाट कोरोनाविरुद्धको खोप अभियान सुरु गरेको थियो । नेपालमा कोरोनाविरुद्ध कोभिसिल्ड खोप प्रयोगमा ल्याइएको छ ।
कोभिशिल्ड खोप भारतको सेरम इन्सटिच्युटले उत्पादन गरेको हो । यो खोप ७० प्रतिशत प्रभावकारी मानिएको छ । खोपले कुनै असर नगर्ने भएकाले निर्धक्कका साथ खोप लगाउन सरकारले सबैमा अपील गरेको छ । सामान्य लक्षण देखिएपनि नडराउन चिकित्सकहरुले सुझाएका छन् ।
यही फागुन २३ गतेदेखि ५० बर्षभन्दा माथीका सबै नागरिकलाई खोप दिने सरकारको तयारी रहेको छ । यसका लागि स्थानीय स्तरमा नै खोप केन्द्र बनाउँने तयारी भइरहेको स्वास्थ्य मन्त्रालयका अधिकारीले जानकारी दिए ।