काठमाडौ । नेपाल कम्युनिष्ट पार्टी (नेकपा) ओली समूहसँग संसदीय दलका सदस्यको संख्या प्रचण्ड–माधब कुमार नेपाल समूहमा भन्दा १० जना बढी देखिएको छ । हिजोको प्रचण्ड–माधब कुमार नेपाल समूहको दलको बैठक १०५ जना सदस्य सहभागी रहेको दावी गरिएको थियो ।

आज शनिबार प्रधानमन्त्री निवास बालुवाटारमा बसेको ओली समूहसँग संसदीय दलको बैठकमा ११५ जनाको सहभागी रहेको छ । जबकी नेकपा संसदीय दलको मतदाता संख्या २२१ हो । यो हेर्दा प्रचण्ड–माधब कुमार नेपाल समूहमा पुगेका एक सांसद आजै ओली समूहमा पुगेका छन् ।

प्रधानमन्त्री तथा ओली समूहका संसदीय दलका नेता केपी शर्मा ओलीले यो संख्या देखेपछि आफूहरूको संख्या अझै बढ्दै जाने बताए। ‘आज ११५ छौं। भोलि १२० हुन्छौं’, हाम्रो संख्या बढ्दै जान्छ’, उनले भने। बैठकमा ११५ सांसद उपस्थित भएको ओली समूहको दाबी छ। यद्यपि बालुवाटारभित्र कुनै पत्रकारलाई छिर्न भने दिइएको थिएन।

बैठकमा प्रधानमन्त्रीले संसदमा दृढताका साथ अगाडि बढ्न निर्देशन दिएको राष्ट्रिय सभाका प्रमुख सचेतक खिमलाल भट्टराईले बताएका छन्। भट्टराईले अविश्वास प्रस्ताव ल्याउन कसैले हिम्मत समेत नगर्ने बताए। ‘अविश्वासको प्रस्ताव ल्याउन कसैले हिम्मत गर्दैनन्। जो बाहिर हुनुहुन्छ, उहाँहरू पनि फर्कनुहुन्छ। नेकपा विभाजन हुन कठिन छ,’उनले भने।

बैठकमा वामदेव गौतम, लालबाबु पण्डित र तुलसा थापा उपस्थित थिएनन्। उनीहरू प्रचण्ड–नेपाल समूहको संसदीय दलको बैठकमा पनि सहभागी थिएनन्। गत पुस ५ गते प्रधानमन्त्री केपी शर्मा ओलीले संसद विघटन गरेपछि नेकपा दुई समूहमा बाँडिएको छ। बैठकमा ओलीले संसदका गतिविधिमा सक्रियतापूर्वक केन्द्रित हुन सांसदहरूलाई निर्देशन दिएका छन्।

उनले सांसदहरू नआत्तिन पनि सुझाए। ‘हामी आत्तिनु पर्ने केही छैन। संसद चल्छ। हामी मजाले अगाडि बढ्न सक्छौं। हामी ढुक्क अवस्थामा छौं’, प्रधानमन्त्रीको भनाइ उद्धृत गर्दै सांसद किसान श्रेष्ठले भने।

प्रचण्ड–नेपाल समूहले शुक्रबार संसदीय दलको बैठक गरेको थियो। उक्त बैठकले प्रचण्डलाई संसदीय दलको नेता चयन गरेको छ। सो समूहले आफ्ना पक्षमा १ सय ५ सांसद रहेको दाबी गरेको छ। भोलि आइतबार संसद बैठक बस्दैछ।

सम्बन्धित खबरहरु