जनबोली न्यूज नेटवर्क
काठमाडौं । पतञ्जलिले बजारमा पठाएको तोरीको तेलमा ठूलो कारवाही गरिएको छ ।
मिलावटको आशंकामा कारखाना सिल भएको हो । भारत, राजस्थानको किशनगढ़बास स्थित खैरथलमा पतञ्जलि ब्रान्डको नाममा बाबा रामदेवले तोरीको तेल प्याक गरिरहेको बारेमा जानकारी पाएपछि प्रशासनले सिङ्घानिया तेल मिलमा छापा मारेर कारखाना सिल गरेको हो ।
कारखानामा पतञ्जलिको भारी मात्रामा प्याकिङ्ग सामग्री बरामद गरिएको छ । पतञ्जलिको नाममा मिलावट गरिएको तोरीको तेल आपूर्ति गरेको आरोपमा जिल्ला प्रशासनले खैरथलको इस्माईलपुर रोड स्थित औद्योगिक क्षेत्रमा रहेको सिङ्घानिया तेल मिलमा छापा मारेको हो ।
जानकारी अनुसार खैरथलबाट तोरीको तेल ठूलो मात्रामा यस कारखानाबाट बाबा रामदेवको कम्पनी पतञ्जलि जान्छ । पतञ्जलिको स्ट्याम्प राखेर तेल बजारमा पठाउने गरिएको छ ।
जिल्ला कलेक्टर नन्नुमल पहाडियाले अलवरका उपविभागीय अधिकारी योगेश डागुरको नेतृत्वमा तीन सदस्यीय कमिटी गठन गरेका छन् । उपखण्ड अधिकारी डागुरले किशनगढवाँसका एसडीओ मुकुट चौधरीलाई अवगत गराए । चौधरीको नेतृत्वमा स्थानीय समय अनुसार राति ९ बजे प्रहरीले सिङ्घानिया तेल मिलमा छापा मारेको थियो ।
मिलको भित्र, पतञ्जलिको प्याकिङ्ग र्यापर, बोतल र अन्य धेरै प्रकारका सामग्रीहरू बरामद गरिएको जनाइएको छ । एसडीओ चौधरीको निर्देशनमा मिल सिल गरेर प्रहरीको जिम्मा लगाइएको छ । यस घटनापछि तेल मिलहरुबीच एक हलचल शुरु भएको छ । प्रहरी र प्रशासनले अनुसन्धान सुरु गरेको छ ।
भारतको खाद्य तेल संगठनले पतञ्जलि ब्रान्डको तोरीको तेलको विज्ञापनमा आपत्ति गरिसकेको छ । पतञ्जलिले तोरीको तेलको विज्ञापनमा, देखाइएको छ कि पतञ्जलि बाहेक सबै कम्पनीहरूको कच्चा तेलमा मिलावट छ । खाद्य तेल संगठनले यस विज्ञापनमा आपत्ति जनाउँदै आएको थियो ।
जिल्ला कलेक्टरले पतञ्जलिको तेलमा पनि मिलावट भएको गुनासो प्राप्त गरेका थिए । त्सपछि उनी आफैं यस कारवाहीका क्रममा उपस्थित भएका हुन् । आवश्यक अनुसन्धान पुरा नभएसम्मका लागि प्रशासनले कारखानालाई सिल गरेको छ।