जनबोली न्यूज नेटवर्क
काठमाडौ । यस नेकपा एमाले अध्यक्ष केपी शर्मा ओली नेतृत्वको सरकार ढलिसकेको छ । उता सरकारले नेपाल सरकारको बिशिष्ट श्रेणी अर्थात सचिवमा दुई जना सहसचिव बढुवा गरेको छ ।
सोमबार बसेको नियमित मन्त्रिपरिषद् बैठकले प्रशासन तर्फ एक जना र प्राविधिक तर्फ एक जना गरेर दुई सहसचिवलाई सचिवमा बढुवा गर्ने निर्णय गरेको छ । अदालतको फैसला आउनुभन्दा केही समय अघि मात्र मन्त्रिपरिषद् बैठक बसेको थियो ।
बैठकले प्रशासनतर्फ बढुवा सिफारिस समितिले एक नम्बरमा बढुवाका लागि सिफारिस गरेका खगेन्द्र प्रसाद नेपाल र प्राविधिकतर्फ दुई नम्बरमा सिफारिस गरेका राजेन्द्रप्रसाद खनाललाई सचिवमा बढुवा गरेको छ ।
प्राविधिकतर्फ सिग्देलको अझै समयावधि बाँकी रहेको तर खनाल केही महिनामा अवकाशमा जान लागेकोले खनाललाई सचिव बनाएको स्रोतको दावी छ । उनी गएपछि सिग्देललाई बढुवाका लागि तयार गरिएको छ ।
लोक सेवा आयोगका अध्यक्ष माधव प्रसाद रेग्मीको अध्यक्षतामा आइतबार साँझ सिंहदरवारमा बसेको बढुवा सिफारिस समितिको बैठकले प्रशासनतर्फ सचिव बढुवाका लागि एक नम्बरमा नेपाल, दुइ नम्बरमा किरण राज शर्मा र तीन नम्बरमा रामप्रसाद घिमिरेको नाम सिफारिस गरेको थियो ।
यस्तै आइतबार साँझ नै बसेको बढुवा सिफारिस समितिको बैठकले प्राविधिकतर्फ एक नम्बरमा गोपालप्रसाद सिग्देल, दुइ नम्बरमा खनाल र तीन नम्बरमा सरजु कुमार वैद्यको नाम सिफारिस गरेको थियो ।
यस अघि निरन्तर एक नम्बरमा सिफारिस भएका सहसचिवलाई सचिवमा बढुवा गर्ने गरेको भए पनि यस पटक भने दोस्रो नम्बरका खनाललाई बढुवा गरेको छ । उनको विदापछि सिग्देललाई ल्याउने सरकारको तजविज थियो । तर सरकार आजै ढलेको छ ।