काठमाडौ । प्रमुख प्रतिपक्षी दल नेकपा एमाले को आन्तरिक विवादमा आज वारपार हुने भएको छ ।

विवाद समाधान हुन नसकेपछि आज बस्ने स्थायी कमिटी बैठकले ठोस निर्णय गर्ने भएको हो ।

नेता माधवकुमार नेपाल पक्ष सहमतिमा आउन तयार नभएपछि एमालेले सो पक्षलाई छाडेर अघि बढ्ने निस्कर्षमा पुगेको छ ।

शनिबार बसेको स्थायी कमिटी बैठकमा विघटित कार्यदलका संयोजक सुवासचन्द्र नेम्वाङले अहिलेसम्म पार्टीको आन्तरिक समस्या समाधानको प्रयास र प्रगतिबारे बैठकमा व्रिफिङ गरेका थिए ।

नेता नेपालले अध्यक्ष केपी शर्मा ओलीले अध्यक्ष पद त्यागेमा मात्र आफू एमालेसँग एक भएर जाने बटमलाइन सुनाएपछि पार्टीको आन्तरिक विवाद अब नसल्टिने करिब पक्का भएको छ ।

यद्यपि आज बैठक अघिसम्म सहमतिको प्रयास जारी राख्ने विश्वास गरिएको छ । यसका लागि आज विघटित एकता कार्यदलको बैठक बस्दैछ ।

बैठक आज तीन बजेकालागि पुनः बोलाइएको पार्टी कार्यालय सचिव शेरबहादुर तामाङले बताउनुभयो ।

शनिबार करिब पौने घण्टा चलेको स्थायी कमिटी बैठकमा पार्टीको आन्तरिक विवाद समाधानकै विषयमा केन्द्रित भएर छलफल भएको थियो ।

प्रमुख तीन वटा एजेण्डामा छलफल गर्ने कार्यक्रम तय गरिएको भएपनि शनिबार त्यस विषयमा छलफल हुन सकेन् ।

 

सम्बन्धित खबरहरु