काठमाडौ । सरकारले चालु आर्थिक वर्षको बजेटलाई परिमार्जन गरेको छ । नेकपा एमालेका अध्यक्ष केपी शर्मा ओली नेतृत्वको सरकारले ल्याएको बजेट परिमार्जन गरेको हो ।

बजेट अध्यादेशले ल्याएको बजेट अंकलाई परिमार्जन गर्दै सरकारले १६ खर्ब ३२ अर्ब ८३ करोड रुपैयाँको बजेटको प्रतिस्थापन विधेयक ल्याएको छ ।

अर्थमन्त्री जनार्दन शर्माले बजेटमार्फत ऋणको लक्ष्य ३७ अर्बले घटाएको जानकारी दिनुभएको छ ।

नेपाली कांग्रेसका सभापति शेरबहादुर देउवा नेतृत्वको सरकारले आजैबाट प्रतिस्थापन विधेयकमार्फत् बजेट प्रस्तुत गरेको हो । एमालेको नारावाजी र अवरोधका बाबजुद बजेट प्रतिस्थापन विधेयक संसदमा पेस भयो ।

अर्थमन्त्री शर्माले चालु खर्च अन्तर्गतका बैठक भत्ताहरूमा खर्च कटौती गर्ने र यसबाट उब्रिएको ५ अर्ब कोभिडमा खर्च गरिने बताउनुभयो ।

यसैगरी मिर्गौला तथा मेरुदण्डका दीर्घरोगीलाई ५ हजार रूपैयाँ भत्ता दिइने भएको छ । यसअघि देउवा नेतृत्वकै सरकारले यो निर्णय गरेको भए पनि कार्यान्वयनमा आएको थिएन ।

विभिन्न राजनीतिक तथा परिवर्तनका आन्दोलनमा वलिदान गर्ने परिवार (शहीद) लाई जीवनवृत्तिस्वरूप मासिक ३ हजार प्रदान गरिने अर्थमन्त्री शर्माले बताउनुभयो ।

सरकारले कोरोना महामारीका कारण रोजगारी तथा आजआर्जन गुमाएका अनौपचारिक एवं असंगठित क्षेत्रका गरीब तथा विपन्न परिवारलाई रकम दिने भएको छ ।

सरकारले त्यस्ता परिवार ५ लाख रहेको अनुमान गरेको छ । उक्त प्रति परिवारलाई १० हजार नगद अनुदान दिने संशोधित बजेटमा उल्लेख छ ।

शुक्रबार प्रमुख विपक्षी नेकपा एमालेका सांसदहरुको नाराबाजीका बीच बजेट अध्यादेशको प्रतिस्थापन विधेयक संसदमा पेश गर्दै अर्थमन्त्री जनार्दन शर्मा प्रभाकरले यस्तो घोषणा गर्नुभएको हो ।

तत्कालिन नेकपा एमाले अध्यक्ष केपी शर्मा ओली नेतृत्वको सरकारले ल्याएको बजेट संशोधन गरेर संशोधित बजेट संसदमा पेश भएको छ ।

उक्त बजेटमा यो विषय समेटिएको अर्थमन्त्रीले जानकारी दिनुभयो ।

उहाँले भन्नुभयो, ‘कोभिड–१९ का कारण रोजगारी र आयआर्जन गुमाएका अनौपचारिक एवं असंगठित क्षेत्रका गरिव तथा विपन्न करीब ५ लाख परिवारलाई एक पटकका लागि प्रति परिवार रु १० हजार निश्चित मापदण्डका आधारमा नगद अनुदान प्रदान गर्ने प्रबन्ध गरेको छु ।’

सम्बन्धित खबरहरु