काठमाडौं । वैदेशिक रोजगार विभागले इजरायलमा सुसारे (केयर गिभर) मा जान इच्छुक श्रमिक लागि लिइएको अंग्रेजी भाषा परीक्षाको परीक्षाफल सार्वजनिक भएको छ ।

परीक्षा भएको दोस्रो दिन नै नतिजा सार्वजनिक भएको हो । विभागले सोमबार सञ्चालन गरेको परीक्षाको परीक्षाफल जारी गरेको हो ।

विभागका अनुसार एक हजार ३९५ जना महिला र ६४४ पुरुष गरी कुल दुुई हजार ३९ जना अंग्रेजी भाषा परीक्षामा उत्र्तीण भएका छन् ।

इजरायल जान चार हजार २०० महिला र पाँच हजार ४९९ पुरुष गरी नौ हजार ६९९ जनाले आवेदन दिएका थिए । जसमध्ये छ हजार ३१७ जना लिखित परीक्षामा सहभागी भएका थिए ।

विभागका निर्देशक कमल ज्ञवालीले भाषा परीक्षामा छनोट भएका उम्मेदवारहरूको आगामी असोज १ गतेबाट व्यावसायिक सीप विकास प्रतिष्ठान भैँसेपाटी ललितपुरमा उचाइ र तौल परीक्षण तथा अन्तर्वार्ता हुने जानकारी दिनुभयो ।

उहाँका अनुसार छनोट भएका उम्मेदवारले उचाइ र तौलको परीक्षण तथा अन्तर्वार्तामा सम्मिलित हुनु पर्छ । विभागका अनुसार आवेदक २५ वर्ष पूरा भई ४५ वर्ष ननाघेको, १.५ मिटर उचाइ र कम्तीमा ४५ केजी तौल भएको हुनुपर्छ ।

यो अनुसार उचाइ र तौल नहुने उम्मेदवारलाई अन्तर्वार्तामा सहभागी नगराइने विभागले जनाएको छ । विभागका अनुसार तोकिएको शैक्षिक योग्यता, तालिमका प्रमाणपत्र एवं अनलाइन दरखास्तका साथ पेस गरिएका कागजात प्रमाणित नभएमा जुनसुकै बखत दरखास्त रद्द हुनेछ ।

यसका लागि शैक्षिक योग्यता कम्तीमा १० कक्षा उत्तीर्ण गरी अनमी वा सीएमएसम्बन्धी विषयको कम्तीमा एक वर्ष तीन महिनाको अध्ययन पूरा गरेको वा कक्षा १२ वा सो सरहको शैक्षिक योग्यता हासिल गरी नेपाल सरकारबाट मान्यता प्राप्त तालिम प्रदायक संस्थाबाट केयर गिभिङसम्बन्धी तीन महिनाको तालिम प्राप्त गरेको हुनुपर्ने कुरा मापदण्डमै उल्लेख गरिएको छ ।

नेपाल सरकार र इजरायल सरकारबीच २०७६ असोज १४ गते सम्पन्न श्रम सम्झौताअनुसार इजरायलका दीर्घकालीन सुुसारेका लागि नेपाली सहायक कामदार पठाउन लागेको हो ।

सरकार टु सरकार (जीटुजी) मार्फत इजरायलमा केयर गिभर, कृषि, होटल र रेस्टुरेन्ट, निर्माणलगायत क्षेत्रमा नेपालीलाई रोजगारीको अवसर दिनेछ । पहिलो चरणमा केयरगिभरको मात्रै माग आएको छ ।

सम्बन्धित खबरहरु