सहमति विपरीत समिति गठन गर्नु महाभूल – अध्यक्ष दाहाल, समिति निर्माणमा सहयोग पुर्याएकोमा देउवाको धन्यवाद

संविधानसभाको आजको बैठकबाट बाहिरिने क्रममा सञ्चारकर्मीसँग सङ्क्षिप्त प्रारम्भिक प्रतिक्रिया दिँदै उहाँले प्रश्नावली निर्माण कार्यसँग राजनीतिक दलहरु स्पष्ट रुपमा दुई कित्तामा विभाजित भएको बताउनुभयो ।

उहाँले भन्नुभयो, “दलबीच ठूलो विभाजन भयो, दुई कित्तामा उभिनुपर्ने परिस्थिति देखिएको छ, मुलुकलाई प्रतिगमन र द्वन्द्वतिर लैजाने काम भएको छ ।” संविधानसभाका अध्यक्ष पार्टीको प्रवक्ताका रुपमा प्रस्तुत हुनुभएको बताउँदै अध्यक्ष दाहालले सभाध्यक्षले कलङ्कको टीका लगाउनुभएको प्रतिक्रिया दिनुभयो ।

अध्यक्ष दाहालले भन्नुभयो, “सयौँ प्रहरी तैनाथ गरेर संविधानसभालाई व्यारेकमा परिणत गर्ने बडो विचित्र खेल भएको छ । जनतामाथि प्रहार भएको छ । अन्तिम दिनसम्म यस्ता हर्कतविरुद्ध प्रतिवाद गर्नेछौँ ।’” नियम कानुन मिचेर चालिएको उक्त कदमले शान्ति सम्झौताको मूल मर्ममाथि नै प्रश्न खडा गरेको र तरबार उज्याएको उहाँले बताउनुभयो ।

अध्यक्ष दाहालले नियम र कानुन विपरीत संविधानसभामा ल्याइएको प्रश्नावली निर्माणसम्बन्धी प्रस्तावका विरुद्ध जनतामा जाने जानकारी दिनुभयो ।

मधेसी जनअधिकार फोरम नेपालका अध्यक्ष उपेन्द्र यादवले ऐन, नियमविपरीत प्रश्नावली समिति गठनसँगै दलहरु स्पष्ट रुपमा विभाजित भएको प्रतिक्रिया दिनुभयो ।

सहमतिको प्रक्रिया आरम्भ – उपसभापति पौडेल

नेपाली काँग्रेसका उपसभापति रामचन्द्र पौडेलले प्रश्नावलीसम्बन्धी समिति गठनको घोषणासँगै सहमतिको प्रक्रिया आरम्भ भएको जानकारी दिनुभयो ।

एमाओवादी सहितका दलसँगसमेत सल्लाह गरी अघि बढ्ने बताउँदै उहाँले संविधान निर्माण कार्यमा संलग्न नभएर उहाँहरु कहाँ जाने ? भनी प्रश्न पनि गर्नुभयो ।

सहमतिका नाममा मुलुकलाई बन्धक बनाउन नहुने प्रतिक्रिया दिँदै उहाँले प्रश्नावली समिति गठनसँगै दलबीच देखिएको विवाद पनि हल भएको बताउनुभयो ।

दलबीच संवाद र सहमतिको प्रक्रिया सुरु गर्न आफू र आफ्नो पार्टी प्रयत्नशील रहने जानकारी दिँदै उपसभापति पौडेलले नेपाली जनताको भावनाअनुसार संविधान जारी गर्न दलहरु सक्षम हुने विश्वास व्यक्त गर्नुभयो ।

नेपाली काँग्रेसका नेता शेरबहादुर देउवाले प्रश्नावली समिति गठन प्रक्रियामा एमाओवादीलगायतका विपक्षी दलले ‘सहयोग गरेको’ भन्दै धन्यवाद दिनुभयो ।

उहाँले भन्नुभयो, “सभाध्यक्ष नेम्वाङलाई पनि म धन्यवाद दिन्छु, शान्तिपूर्ण विरोध गरेर प्रतिपक्ष दललेसमेत सहयोग गरेको छ । म उहाँहरुलाई पनि धन्यवाद दिन्छु ।”

उहाँले आजैबाट विवादित विषयमा सहमति कायम गर्न प्रयत्न गरिने र सहमतिमै संविधान जारी हुने विश्वास व्यक्त गर्नुभयो ।