गुल्मी । नेकपा एमालेका सचिव तथा पूर्वमन्त्री प्रदीप ज्ञवालीले माओवादी केन्द्रका अध्यक्ष पुष्पकमल दाहाल प्रचण्डलाई अस्थिरताको खेती गर्ने खेलाडीको रूपमा व्याख्या गर्नुभएको छ ।

एमाले रेसुंगा नगरकमिटीको प्रथम अधिवेशनको उद्घाटन गर्दै ज्ञवालीले आफ्नो स्वार्थको लागि प्रचण्डले दलका नेतालाई मन्जनजस्तै प्रयोग गर्ने र थुक्ने गरेर अस्थिरताको खेती गरिरहेको आरोप लगाउनुभयो ।

‘प्रचण्डले जनताको रगत र शरीरमा रहेका छर्रा बिर्सेर सत्ताको लागि जे पनि गर्छन् । अहिले कांग्रेसको पाहुना बनेका छन्,’ उहाँले भन्नुभयो, ‘अपवित्र गठबन्धनप्रति जनताको केही आश छैन ।’

त्यस्तै उहाँले एमालेको भोट लगेर कांग्रेसलाई चढाउने माधव नेपालसहितका नेताको कारण पार्टीको आन्तरिक जीवनमा केही असहजता आएपछि आफूहरू प्रतिपक्षमा बसेर पनि जनताकै पक्षमा काम गरिरहेको दावी गर्नुभयो ।

उहाँले उच्चस्तरीय समझदारीसहितको सर्वसम्मत कमिटी चयन गर्न शुभकामना व्यक्त गर्नुभयो ।

अहिले दल, अदालत, निर्वाचन आयोग र सभामुखजस्ता संस्थाबाट समेत घेराबन्दीमा परेकाले पार्टीलाई एक ढिक्का बनाएर अगाडि बढाउन सर्वसम्मत कमिटी निर्माणसँगै संगठन गतिशील बनाउन, पार्टीका विचार र सिद्धान्त जनता माझमा पुर्‍याएर नागरिकसँगको सम्बन्ध थप सुदृढ बनाउन ज्ञवालीले नेता तथा कार्यकर्तालाई निर्देशन दिनुभयो ।

देशमा लोकतन्त्रको उच्चतम अभ्यास गर्ने पार्टी एमाले भएको दाबी गर्दै उहाँले विधान महाधिवेशनसहित देशभर वडा र पालिकाको अधिवेशन एकै साथ सम्पन्न गरिरहेको स्मरण गराउनुभयो ।

उहाँले आज नै मुसिकोट नगर कमिटीको अधिवेशन पनि उद्घाटन गर्नुभयो । गुल्मीका १० गाउँ कमिटी र २ नगर कमिटीको प्रथम अधिवेशन एकैसाथ सुरू भएका छन् ।

सम्बन्धित खबरहरु