काठमाडौ । भारतीय स्थल सेनाध्यक्षको औपचारिक निमन्त्रणामा प्रधानसेनापति प्रभुराम शर्मा आज भारत प्रस्थान गर्नुभएको छ । प्रधानसेनापति भएपछि शर्माको यो पहिलो विदेश भ्रमण हो।

भारतीय स्थल सेनाध्यक्षको मानार्थ दर्ज्यानी ग्रहण गर्न प्रधानसेनापति शर्मा भारत जानुभएको हो ।

प्रधानसेनापति शर्मा ९ सदस्यीय सैनिक टोलीको नेतृत्व गर्दै सेनाको जहाजमा भारतको राजधानी नयाँदिल्ली जानुभयो ।

प्रधान सेनापति शर्मा कार्तिक २३ गते (तदनुसार ९ नोभेम्बर २०२१) देखि कार्तिक २६ गते (तदनुसार १२ नोभेम्बर २०२१) सम्म औपचारिक भ्रमणको लागि श्रीमति सुनिता शर्मा सहित ९ सदस्यीय भ्रमण दलकासाथ आज मित्रराष्ट्र भारतको दिल्लीतर्फ प्रस्थान गर्नु भएको छ ।

नेपाली सेनाको मध्य एयर बेश, गौचरमा उहाँलाई बलाधिकृत रथी बालकृष्ण कार्कीले बिदाई गर्नु भएको थियो ।

भारत प्रस्थान गर्नुपूर्व प्रधान सेनापति महारथी शर्मालाई मिति २०७८ कार्तिक २२ गते जंगी अड्डामा सम्मान गारत अर्पण गरिएको थियो ।

उक्त औपचारिक विदाई कार्यक्रममा नेपालका लागि भारतीय राजदुत विनय मोहन क्वात्रा र अन्य मित्र राष्ट्रका सैनिक सहचारीहरुको पनि उपस्थिति थियो ।

प्रधान सेनापतिको नियुक्ति पश्चातको पहिलो विदेश भ्रमणको रुपमा हुन लागेको यस भ्रमणको दौरान प्रधान सेनापति शर्मालाई मिति २०७८ कार्तिक २४ गते भारतका राष्ट्रपति राम नाथ कोविन्दबाट भारतीय स्थल सेनाको मानार्थ महारथी दर्जाको दर्ज्यानी चिन्हबाट सुशोभन गर्ने कार्यक्रम रहेको छ ।

भ्रमणको क्रममा प्रधान सेनापति महारथी शर्माले विभिन्न भारतीय उच्चपदस्थ पदाधिकारीहरुसँग भेटघाट गर्नु हुने छ ।

उहाँले आजै भारतीय रक्षा सचिव अजय कुमार, भारतीय चिफ अफ डिफेन्स स्टाफ जनरल विपिन रावत, भारतीय सेनाध्यक्ष जनरल एम एम नरवणे र भारतीय वायु सेनाध्यक्ष एयर चिफ मार्शल भि आर चौधरीसँग समेत भेटघाट गर्नु हुने कार्यक्रम रहेको छ ।

प्रधान सेनापति महारथी शर्माको भारत भ्रमणको अवधिभर उहाँको अनुपस्थितीमा बलाधिकृत रथी बालकृष्ण कार्कीले कायम मुकायम प्रधान सेनापतिको कार्यभार सम्हाल्नु हुनेछ । उक्त भ्रमण सम्पन्न गरी प्रधान सेनापति महारथी शर्मा सहितको भ्रमणदल मिति २०७८ कार्तिक २६ गते स्वदेश फिर्ता हुने कार्यक्रम रहेको छ ।

नेपाल र भारतका सेना प्रमुखहरुलाई कदरस्वरुप एकअर्को मुलुकको मानार्थ महारथीको दर्जाबाट सम्मान गर्ने प्रचलन छ।

भारतीय राष्ट्रपति रामनाथ कोविन्दले राष्ट्रपति कार्यालयमा कार्तिक २४ गते हुने विशेष समारोहमा प्रधानसेनापति शर्मालाई भारतीय स्थल सेनाको मानार्थ महारथीको दर्ज्यानी चिन्हबाट सम्मान गर्नुहुनेछ ।

राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवाणेलाई राष्ट्रपति कार्यालयमा आयोजित विशेष समारोहमा २०७७ कार्तिक २० गते नेपाली सेनाको मानार्थ प्रधानसेनापतिको दर्ज्यानी प्रदान गर्नुभएको थियो ।

Facebook Notice for EU! You need to login to view and post FB Comments!

सम्बन्धित खबरहरु