काठमाडौ । काठमाडौं मेडिकल कलेज (केएमसी) र नोबेल मेडिकल कलेज विराटनगरका सञ्चालक सुनील शर्माले विद्यार्थीसँग अतिरिक्त शुल्क लिइछाड्ने अडान दोहोर्‍याउनुभएको छ ।

शिक्षा मन्त्रालयले शुल्क विवादबारे शुक्रबार गरेको छलफलमा शर्माले शिक्षामन्त्री देवेन्द्र पौडेलकै अगाडि अतिरिक्त शुल्क लिने सक्ने भए कारबाही गरेर देखाउँन चुनौती दिनुभयो ।

सरोकारवालासँगको छलफलपछि शिक्षा मन्त्रालयले चिकित्सा शिक्षा आयोगले तोकेभन्दा बढी शुल्क लिन नहुने निर्णय गर्दासमेत शर्माले फरक मत (नोट अफ डिसेन्ट) लेख्नुभएको छ  ।

शिक्षा मन्त्रालयमा आयोग, त्रिभुवन विश्वविद्यालय, काठमाडौं विश्वविद्यालय, अभिभावक, विद्यार्थी, जिल्ला प्रशासन कार्यालय काठमाडौं र भक्तपुरका प्रतिनिधिसहित बैठक भएको थियो । बैठकपछि आयोगले तोकेभन्दा बढी शुल्क नलिने, अनिवार्य होस्टल बस्नुपर्ने व्यवस्थाको सन्दर्भमा विद्यार्थी र कलेज प्रशासनबीच छलफल गरी टुंगोमा पुग्ने निर्णय भएको मन्त्रालयका उच्चशिक्षा महाशाखाका सहसचिव हरिप्रसाद लम्सालले जानकारी दिनुभयो ।

शुक्रबारको छलफलमा आगामी वर्षका लागि विश्वविद्यालय, काउन्सिललाई बुझाउनुपर्ने शुल्क पनि छुट्टै तोक्न आयोगले गृहकार्य थाल्ने निर्णयसमेत गरिएको छ ।

छलफल सकेर फर्कने क्रममा उहाँलाई विद्यार्थीको एक समूहले सिंहदरबारभित्रै मोसो लगाएर दुर्व्यवहार गरेको थियो। अतिरिक्त शुल्क असुल्दै आएका शर्मालाई विद्यार्थीले ‘नमस्कार सर’ भन्दै मोसो दलेको एक प्रत्यक्षदर्शीले बताउनुभयो । समाजवादी विद्यार्थी युनियनका अध्यक्ष सुदेश पराजुलीले घटनाको जिम्मा लिनुभएको छ ।

अखिल क्रान्तिकारीकी अध्यक्ष पञ्जा सिंहले पनि संयुक्त विद्यार्थी संघर्ष समितिले मोसो दलेको बताउनुभएको छ । शर्माका मेडिकल कलेजले चिकित्सा शिक्षाका विद्यार्थीसँग अतिरिक्त शुल्क मागेको विरोधमा नेविसंघसहित सत्तारूढ दलनिकट ७ विद्यार्थी संगठन र प्रतिपक्षी एमालेनिकट अनेरास्ववियु सँगै आन्दोलनमा छन् ।

शिक्षा मन्त्रालय, गृह मन्त्रालय, चिकित्सा शिक्षा आयोगले अतिरिक्त शुल्क नलिन पटकरपटक निर्देशन दिएको भए पनि केएमसी र नोबेल मेडिकल कलेजले अवज्ञा गर्दै आएका छन् ।

दुवै कलेजले होस्टल अनिवार्य गर्दै लाखौं शुल्क मागेका हुन् । दुई जना बस्न मिल्ने एउटा कोठाको मासिक भाडा २४ हजार रुपैयाँ तोकिएको छ । सम्बन्धन, विश्वविद्यालय, नेपाल मेडिकल काउन्सिल, इन्टर्नसिप शुल्क लगायत शीर्षकमा करिब ६ लाख रुपैयाँ अतिरिक्त शुल्क मागिएको छ ।

केयू सम्बन्धन शुल्क भनेर साढे ९८ हजार रुपैयाँ मागिएको छ । केयू रजिस्ट्रेसन शुल्क २५ हजार, परीक्षा शुल्क ११ हजार, नेपाल मेडिकल काउन्सिल रजिस्ट्रेसन शुल्क ५ हजार र भर्ना फाराम शुल्क ५ हजार मागिएको छ ।

चिकित्सा शिक्षा ऐनको प्रावधानअनुसार यी शिक्षण शुल्कभित्र पर्छन् । इन्टर्नसिप शुल्क मात्रै साढे २ लाख माग गरिएको विद्यार्थीले जनाएका छन् । कतिपय विद्यार्थी बढी शुल्क बुझाएर कक्षामा सहभागी भएका छन् । बढी शुल्क नबुझाउने विद्यार्थीलाई कक्षा प्रवेशमा रोक लगाइएको छ ।

शर्माले भने कलेजले शिक्षण शुल्कबाहेक विद्यालय, काउन्सिल लगायत अन्य निकायलाई तिर्नुपर्ने शुल्क मागिएको बताउनुभयो । ‘हामीले अतिरिक्त शुल्क मागेकै छैनौं, हामीले विश्वविद्यालयलाई बुझाउनुपर्ने रकम मात्र मागेका हौं,’ उहाँले भन्नुभयो । यी अतिरिक्त शुल्कभित्र नपर्ने उहाँको दाबी छ । अन्य मेडिकल कलेजमा भने आयोगले तोकेको एकमुष्टबाहेक अन्य शुल्क मागिएको छैन ।

शर्मा कांग्रेसको महाधिवेशन प्रतिनिधि हुनुहुन्छ । उहाँ २०७४ सालको प्रतिनिधिसभा निर्वाचनमा उम्मेदवार समेत हुनुहुन्थ्यो । विद्यार्थीले गृह, शिक्षा, जिल्ला प्रशासन कार्यालय, चिकित्सा शिक्षा आयोगमा उजुरी दिँदासमेत सत्तारूढ दलकै संरक्षणमा उहाँमाथि कानुनी कारबाही नभएको पीडित अभिभावकले गुनासो गर्नुभयो ।

चिकित्सा शिक्षा आयोगका अध्यक्ष प्रधानमन्त्री, सहअध्यक्ष शिक्षा र स्वास्थ्यमन्त्री रहने व्यवस्था छ । यसअघि पनि यी दुई मेडिकल कलेजले ६३ करोडभन्दा बढी अतिरिक्त शुल्क लिएको छानबिनमा भेटिएको थियो । तर कारबाही भएको छैन । यो खबर मुल रुपमा कान्तिपुर दैनिकमा छापिएको छ ।

सम्बन्धित खबरहरु