काठमाडौं । उपराष्ट्रपति नन्दबहादुर पुनले सञ्चार तथा सूचना प्रविधिको विकासलाई राज्यले उच्च प्राथमिकतामा राख्नुपर्ने बताउनुभएको छ ।

आइसिटी फाउण्डेशन नेपालले यहाँ आज आयोजना गरेको ‘हुवावे डिजिटल नेपाल कम्क्लेभ इन एसोशियसन वीथ इन्फो डेभलपर्स एण्ड कनेक्टेड बाई एनसेल’ विषयक कार्यक्रममा उहाँले आइसिटी क्षेत्रको तीव्र विकासका निम्ति राज्यले योजनाबद्धरुपमा कार्य अघि बढाउनुपर्ने आवश्यकता औँल्याउनुभयो ।

डिजिटल रुपान्तरण भनेको विकास र समृद्धिको पनि रुपान्तरण भएको उल्लेख गर्दै उपराष्ट्रपति पुनले सरकारले सार्वजनिक गरेको डिजिटल नेपाल फ्रेमवर्कको सपना पूरा गर्ने लक्ष्यअनुरुप गतिविधि अगाडि बढाउनुपर्नेमा जोड दिनुभयो ।

आइसिटीको विकाससँगै सम्भावना, चुनौती र व्यवस्थापनको पक्षमा व्यवस्थित ढङ्गले अगाडि बढ्नुुपर्ने र त्यसका निम्ति आवश्यक पर्ने सामग्रीको आविष्कार र उत्पादन पनि नेपालमै गर्ने प्रयास गर्नुुपर्ने उपराष्ट्रपति पुनको भनाइ छ । इन्टरनेटका माध्यमबाट जनतालाई सर्वसुलभ सेवा प्रदान गर्नुपर्ने भन्दै उहाँले सुशासनसँगै पूर्णरुपमा डिजिटल गर्भमेन्ट हुनुपर्ने जोड दिनुभयो ।

उपराष्ट्रपति पुनले भन्नुभयो, “वर्तमान युग सूचना तथा प्रविधिको युग हो, संसार डिजिटलमय हुँदै गर्दा आइसिटी नेपालीको पनि दैनिकी भइसकेको छ, नेपालले उच्च गतिको इन्टरनेट सेवा प्राप्त गरिरहेको छ, सूचना प्रविधिका कारण जुनसुकै काम पनि छिटो छरितो हुँदै गएको छ ।” दैनिक जीवनसँगै सरकारी सेवालाई सरल, सहज र जनमुखी बनाउन प्रविधिको उच्चतम प्रयोग गर्नुको विकल्प नरहेको उल्लेख गर्दै उहाँले तत्कालका लागि विश्वमा विकसित भएका विज्ञान प्रविधिको उच्चतम् प्रयोगबाट नै कार्य सम्पन्न गर्दै त्यसलाई नेपालका सबै शहर र गाउँसम्म पु¥याउन तीनै तहका सरकारको सक्रियता हुनुपर्ने उहाँले बताउनुभयो ।

नेपाल आफैँले विज्ञान प्रविधिको विकास नगरेसम्म अन्य क्षेत्रको विकास हुन नसक्ने उपराष्ट्रपति पुनको भनाइ छ । “आज जुनसुकै मुलुक समृद्ध बनेका छन्, ती सबै मुलुकले कुनै न कुनै खालको विज्ञान र प्रविधिको आविष्कार गरेका छन्, विज्ञान प्रविधिको आविष्कार गर्न नसकेका हामी जस्ता अल्पविकसित अवस्थामा छौँ, मुलुकलाई समृद्धितर्फ लैजान विकास प्रविधिको आविष्कार आवश्यक छ”, उहाँले भन्नुभयो ।

देशलाई डिजिटलमय बनाउन जलविद्युत्, पर्यटन, कृषि र सूचना प्रविधि र उद्योगलाई समुन्नत नेपालको आधारस्तम्भका रुपमा विकास गर्न सकिने थुप्रै सम्भावना रहेको उपराष्ट्रपति पुनको भनाइ छ । सोल्टीमोडस्थित दी सोल्टी होटलमा आइतबारसम्म सञ्चालन हुने सो कार्यक्रममा नेपालको सूचना प्रविधिका क्षेत्रको विकास र विस्तारका लागि नीतिगत तथा कार्यान्वयनको विश्लेषण र भावी कदमबारे छलफल हुनेछ ।

सम्बन्धित खबरहरु