सप्तरी । संविधानसभा सदस्य सदरुल मियाँ हकको हत्या आरोपमा सर्वस्वसहित जन्मकैदको सजाय पाएकी उनकै छोरी रुबेदा खातुन ९ वर्षमै रिहा भएकी छन् । जन्मकैदको सजाय पाएकी मृतककी पत्नी नुरजहाँ भने २०७४ सालमै थुनामुक्त भइसकेकी छन् ।

६ जेठ २०७० को राति सभासद् हक सुतेको तत्कालीन कल्याणपुर गाविस २ स्थित आफ्नै पेट्रोल पम्पमा धारिलो हतियार प्रहार गरी उनको हत्या गरिएको थियो ।

५५ वर्षीय हकको हत्या योजनाकार छोरी रुबेदालाई २३ जेठ र नुरजहाँलाई २४ जेठ २०७० मा नेपाल प्रहरीको केन्द्रीय अनुसन्धान ब्युरोको विशेष टोलीले पक्राउ गरेको थियो ।

२० असार २०७३ मा जिल्ला अदालत, सप्तरीले दुबैलाई जन्मकैदको फैसला गरेको थियो ।

जिल्ला न्यायाधीश महेन्द्रप्रसाद पोखरेलको एकल इजलासले ५२ वर्षीया नुरजहाँ र २१ वर्षीया रुबेदालाई जन्मकैदको फैसला गरेको थियो ।

अदालतले जन्मकैदको फैसला गरे पनि रुबेदा ९ वर्षमै रिहा भएकी छन् । संविधान दिवसको अवसरमा मन्त्री परिषद्को सिफारिसमा राष्ट्रपतिले दिएको आममाफी पाउनेमध्येका रुबेदा पनि हुन् । राजविराज कारागारमा रहेकी उनलाई सोमबार रिहा गरिएको छ ।

जिल्ला अदालतबाट जन्मकैदको सजाय पाएकी रुबेदाकी आमा नुरजहाँ भने २० साउन २०७४ मै थुनामुक्त भइसकेकी छन् । जिल्ला अदालतको फैसलालाई उच्च अदालत राजविराजको इजलासले आंशिक रुपमा उल्टाएपछि उनी थुनामुक्त भएकी थिइन् ।

सभासद् हकको हत्याका मुख्य योजनाकार भारतीय नागरिक ३९ वर्षीय जमिरुल शेख र सिरहा चतरी गाविस–२ का ३४ वर्षीय एनुल शेख थिए । जमिरुल लहान नगरपालिका ५ मा बस्दै झाडफुकको काम गर्दै आएका थिए । उनी रुबेदाकी प्रेमी पनि थिए ।

रुबेदा र जमिरुलको प्रेमसम्बन्धमा आमा नुरजहाँको सहमति रहे पनि पूर्व सभासद् एवम् रुबेदाका बुबा हकको असहमतिमा २०६९ फागुनमा रौतहटमा गई विवाह गरेको र सो विवाहलाई हकले अस्वीकार गर्दै आएका थिए । आफ्नो प्रेममा बाधक बनेको भन्दै रुबेदाले आमा नुरजहाँ समेतको सहमतिमा योजना बनाई हत्या गराएकी थिइन् ।

६ जेठ २०७० को राति हकको धारिलो हतियार प्रयोग गरी हत्या भएको थियो । हक २८ चैत २०६४ मा भएको पहिलो संविधानसभा निर्वाचनमा सप्तरीको तत्कालीन क्षेत्र नम्बर ५ बाट स्वतन्त्र उम्मेदवारी दिएर निर्वाचित भएका थिए ।

सम्बन्धित खबरहरु