काठमाडौं । उपप्रधानमन्त्री तथा गृहमन्त्री रवि लामिछानेले नेकपा (एमाले) बाट निर्वाचित सांसद लक्ष्मी महतोलाई पक्राउ गर्न प्रहरीलाई निर्देशन दिएको बताउनुभएको छ ।

बुधबार राष्ट्रिय प्रजातन्त्र पार्टीले आयोजना गरेको चियापान कार्यक्रममा पत्रकारहरुले सोधेको प्रश्नको जवाफ दिँदै उहाँले फौजदारी मुद्दाका आरोपी सांसद महतोलाई पक्राउ गर्न प्रहरीलाई निर्देशन दिइसकेको बताउनुभयो ।

मंगलबार प्रधानमन्त्री पुष्पकमल दाहाल प्रचण्डले विश्वासको मत लिँदा सांसद महतो प्रतिनिधिसभा बैठकमा सहभागी भइ प्रधानमन्त्रीको पक्षमा मत दिएपछि यस विषयमा चर्चा भएको थियो । फौजदारी अभियोग लागेका व्यक्ति कसरी संसद बैठकमा पुग्न सके धेरैले प्रश्न गरेका छन् ।

बुधबार पत्रकारहरुले गृहमन्त्री लामिछानेलाई फरार अभियुक्त संसदमै उपस्थित हुँदा पनि किन पक्राउ गर्न सक्नुभएन भनी प्रश्न गरेपछि रविपनि संकटमा पर्नुभयो ।

जवाफमा उहाँले भन्नुभयो, ”मैले देखिन । पछि सञ्चार माध्यमबाट थाहा पाएपछि आईजीपीलाई फोन गरेर पक्राउ गर्न निर्देशन दिइसकेको छु ।’

मधेश आन्दोलनका क्रममा असई थमन विकलाई घाइते अवस्थामा एम्बुलेन्सबाट निकालेर हत्या गरेको घटनामा सांसद महतो पनि आरोपित हुनुहुन्छ ।

सोही घटनामा रेशम चौधरी अहिलेपनि जेलमा हुनुहुन्छ । प्रधानमन्त्री पुष्पकमल दाहाल प्रचण्डले भने संसदबाटै कानून बनाएर चौधरीलाई छुटाउने बाचा गर्नुभएको छ ।

 

सम्बन्धित खबरहरु