काठमाडौं । भारत, हरियाणा, फतेहाबादको एक अदालतले प्रसिद्ध जलेबी बाबालाई १४ वर्ष जेल सजाय सुनाएको छ । बाबालाई बलात्कार प्रकरणमा दोषी ठहर गर्दै जेल सजाय सुनाइएको हो । बिल्लुराम उर्फ अमरपुरीविरुद्ध उक्त सजाय सुनाइएको भारतीय संचारमाध्यमहरुले जानकारी दिएका छन् ।
अदालतले बाबालाई १४ वर्ष कैद, ३५ हजार जरिवाना, ३७६सी मा ७–७ वर्ष, पोक्सो ऐनमा १४ वर्ष र ६७ आईटी ऐनमा ५ वर्षको सजाय सुनाएको छ । उनीमाथि सबै सजाय एकसाथ चल्ने बताइएको छ । तर अदालतले बाबालाई हतियार ऐनमा भने सफाइ दिएको छ ।
जलेबी बाबामाथि महिलाहरूलाई पेयपर्दाथमा नशालु चक्की खुवाएर बलात्कार गरेको आरोप लागेको थियो । बाबाले उनीहरूलाई ब्ल्याकमेल पनि गर्थे । बाबा अमरपुरी उर्फ जलेबी बाबालाई अदालतले जनवरी ५ मा दोषी ठहर गरेको थियो ।
६ तारिखमा बहसपछि सजायको घोषणा गर्ने मिति तय गरियो । गत जनवरी ९ मा सजायको विषयमा बहस भएको थियो । तर जनवरी १० मा अदालतले फैसला सुनायो । त्यस क्रममा बाबा अदालतमा धेरै रोए । उनले न्यायाधीश समक्ष दयाको भिख मागिरहेका थिए ।
बाबाका १२० भन्दा बढी अश्लील भिडियोहरु सार्वजनिक भएका थिए । उक्त मुद्दामा ६ जना पीडित महिलाले अदालतमा बाबाविरुद्ध बयान दिएका थिए । तर पछि तीन पीडितको बयानका आधारमा अदालतले बाबाविरुद्ध उक्त फैसला सुनाएको हो ।
१९ जुलाई, २०१८ मा, टोहाना शहर प्रहरीले तत्कालीन स्टेशन इन्चार्ज प्रदीप कुमारको उजुरीको आधारमा बाबा बालकनाथ डेराका बाबा बिल्लुराम, अमरपुरी उर्फ जलेबी बाबाविरुद्ध आईपीसीको गम्भीर धारा अन्तर्गत मुद्दा दर्ता गरेर अनुसन्धान थालेको थियो ।
जानकारी अनुसार प्रदीप कुमारको मोबाइलमा एक जनाले प्रमाणका रुपमा जलेबी बाबाको अश्लील भिडियो पठाए । त्यसपछि प्रहरीले उनलाई पक्राउ गर्दा साथबाट १२० वटा भिडियो फेला पार्यो । भिडियोमा उनी महिलासँग शारीरिक सम्बन्ध राखिरहेका थिए ।
प्रहरीले सोधपुछ गर्दा बाबाले आफूकहाँ आउने महिलालाई चियामा नशालु पर्दाथ दिएर मोबाइलबाट भिडियो बनाएको बताए । त्यसपछि सोही भिडियो देखाएर उनले महिलाहरुलाई पटकपटक ब्ल्याकमेल गर्थे । उनीहरुबाट पैसा पनि असुलेको खुलेको छ ।
बाबामाथि आरोप लगाउँदा गाली खाने डरले महिलाले कसैलाई केही भन्न सक्दैन्थे । १३ अक्टोबर, २०१७ मा, एक महिलाको उजुरीमा, आईपीसीको धारा ३२८, २७६, ५०६ मा उनीविरुद्ध शहर प्रहरी टोहानामा उजुरी दर्ता गरिएको थियो ।
त्यसपछि सन् २०१८ मा तत्कालीन एसएचओको उजुरीमा मुद्दा दर्ता भयो । मुद्दा दर्ता गरेपछि घटनास्थलबाट चिमटा, खरानी, विभूति, लागुऔषध चक्की, भिसिआर लगायतका सामान पनि बरामद भयो ।
करिब २० वर्षअघि उनी पञ्जाबको मानसा जिल्लाका अमरवीर तोहाना आएका थिए । त्यहाँ आएपछि उनले टोहानाको नेहरू बजारमा जलेबीको पसल लगाए ।
जलेबीको व्यापार राम्रै चलेपछि गजरेला आदि बनाउन थाले, उनी काम बढाउँदै गए । पसलको नाम अमरवीर पञ्जाबी गिफ्ट्स थियो । त्यो व्यवसाय १० वर्ष राम्रो चल्यो । सोही क्रममा उनकी श्रीमतीको मृत्यु भयो । परिवारमा चार छोरी र दुई छोरा थिए ।
त्यस बीचमा पञ्जाबबाट एक तान्त्रिक आएको बताइन्छ । उनले अमरवीरलाई तान्त्रिक विद्या सिकाएको धेरैको विश्वास छ । त्यसपछि अमरवीर दुई वर्षसम्म तोहानाबाट हराए ।
तर पछि उनी टोहाना फर्किए, वडा नम्बर १९ मा घर लिए । त्यहाँ उनले बाबा बालकनाथको नाममा मन्दिर पनि बनाए । आफ्नो घर बनाएर बच्चाहरुसँग बस्न थाले ।
त्यसपछि अमरवीरले आफ्नो नाम बदलेर अमरपुरी राखे । भक्तजनको दुःख र कष्ट हटाउन बाहिर बोर्ड राखेर बसे । त्यसपछि तान्त्रिक विद्याको जादू सुरु भयो, मान्छेको भीड जम्मा हुन थाल्यो ।
त्यसपछि भेटी पनि बाबाकहाँ आउन थाल्यो । यसबीचमा उनले पञ्जाबमा छोरीसहित ६ सन्तानको विवाह गर्दिए । त्यसपछि उनका सबै छोराछोरी पञ्जाबमा बस्न थाले तर उनी भने त्यहाँ बसिरहेका थिए ।