जनबोली न्यूज नेटवर्क
काठमाडौं । आजकल चीनमा ज्वरोको औषधिको ठूलो मात्रामा भण्डारण भइरहेको छ । जसका कारण अनलाइन सपिङ १०० गुणासम्म बढेको छ ।
गत वर्षको तुलनामा यो वृद्धि हुनुको कारण कोरोनाको त्रासलाई पनि मानिएको छ । चीनले अचानक जीरो कोभिड नीति खुकुलो बनाएको छ र अहिले करोडौं मानिस बजारमा निस्किएर आफ्नो कार्यालयमा जान थालेका छन् ।
यसबाहेक अन्य देशका नागरिकलाई पनि भिसा दिइँदै आएको छ । यस्तो अवस्थामा चीनमा कोरोना संक्रमितको संख्या बढेको छ । अहिले जेनेरिक नाम ओसेल्टामिभिरमा बेच्ने ज्वरोको औषधिको खरिदले सबै रेकर्ड तोडेको छ।
ब्लूमबर्गको रिपोर्ट अनुसार ताओबाओ र मल्ल जस्ता ई–कमर्स कम्पनीहरूले मार्चको पहिलो १३ दिनमा नै ५ लाख ३३ हजार ज्वरोको चक्की बेचेका छन् । तथ्यांकअनुसार गत वर्षको तुलनामा औषत किनमेलमा १२९ प्रतिशतले वृद्धि भएको छ ।
सांघाईमा बस्ने हेल्थकेयर विश्लेषक वाङ रुइझेले देशमा कोरोना संकट बढ्न सक्ने डर मानिसमा रहेको बताए । यस्तो अवस्थामा डरले उनीहरुले ज्वरोको औषधि ठुलो मात्रामा खरिद गरिरहेका छन् ।
औषधिको ठूलो मात्रामा खरिद गर्दा बजारमा मौज्दात घटेको र मूल्य बढेको उनले बताए । वास्तवमा, गत वर्षको अन्त्यमा, चिनियाँ सरकारले अचानक शून्य कोभिड नीतिलाई पूर्ण रूपमा खारेज गर्यो। त्यसयता घटनामा बृद्धि भएको छ । अहिले कोरोना सङ्क्रमितको सङ्ख्या केही कम भए पनि मानिसमा त्रास भने कायमै छ ।
यस्तो अवस्थामा मानिसहरु ठूलो मात्रामा ज्वरोको औषधि किनेर घरमै राख्न चाहन्छन् । वाङ रुइझेले भने, ‘केही मानिसले एन्टी भाइरल औषधिको भण्डारण गरिरहेको देखिन्छ । बालबालिकामा ज्वरोका बिरामी बढेपछि अभिभावकमा त्रास बढेको छ ।
चीनमा ज्वरोका बिरामीको संख्यामा तीव्र वृद्धि भएको छ
चैत २१ गतेदेखि सुरु भएको सातामा ज्वरोका बिरामी बढेका छन् । पछिल्लो एक हप्तामा ज्वरोको सकारात्मकता दर ४२ प्रतिशतको नजिक देखिएको छ । यसअघि २५ प्रतिशत मात्रै थियो । चीनमा जिरो कोभिड नीति खारेज भएपछि अन्य देशमा पनि कोरोनाको त्रास बढेको छ । तर, भारतलगायत धेरै देशमा स्थिति अझै नियन्त्रणमा छ ।
