खुलेरै प्रतिवादमा उत्रिए ‘बोक्सी’का आरोपित

  • जनबोली न्यूज नेटवर्क
  • बुधबार २८ माघ, २०७१

boksi aaropit२८ माघ, सिन्धुली । क्यानेश्वर-९ सिसौदमारका स्थानीयले एकै परिवारका पाँचजनालाई बोक्साबोक्सीको आरोपमा कुटपिट गरी मलमूत्र खुवाएका छन्।

सानीमाया थिङ, उनका पति सानुमान थिङ, बहिनी सन्जीमाया थिङ, आमा बुद्धिमाया स्याङ्तान र फुपू लीलामाया थिङ आफन्त पर्नेले आफूहरूलाई सामूहिक रूपमा पशु र मानिसको मलमूत्र खुवाएर कुटपिट गरेको भन्दै न्याय माग्न मंगलबार साँझ सदरमुकाम सिन्धुलीमाढी आइपुगेको अन्नपूर्ण पोस्टमा खबर    छ ।

दर्ज थिङ, लोभर थिङ, उनकी पत्नी र मायारानी थिङको नेतृत्वमा करिब २० जनाले आफूहरूलाई बोक्साबोक्सी भन्दै कुटपिट गरी मलमूत्र खुवाएको पीडितमध्येकी सानीमायाले बताइन्।

उनका अनुसार उनीहरूले गत बुधबार अपराह्न साढे चार बजे दुर्व्‍यवहार गरेका थिए। कुटपिट गर्ने पक्षले कतै उजुरी गरे मारिदिने धम्की दिएका कारण अरूलाई भन्न नसकेको तर अति भएपछि भागेर सदरमुकाम आएको सानीमायाले बताइन्।

दूधे बालक काखमा च्यापेकी सानीमायाले भनिन्, ‘हामीलाई १५/२० जनाले बोक्साबोक्सीको आरोपमा सुँगुर र मान्छेको मलमूत्र कोच्याएर मराणासन्न हुनेगरी कुटपिट गरे।’

उनीहरूले दुव्र्यवहार गरेपछि चार दिनसम्म घरबाहिर निस्कन नदिएको अर्की पीडित सन्जीमायाले बताइन्।

चार दिनपछि लीलामाया गाउँलेको घेराबाट भाग्न सफल भएपछि घटना बाहिर आएको हो। उनले प्रहरीलाई लिएर घटनास्थल पुग्दा पीडकहरू फरार थिए। त्यसपछि पीडित सबै सदरमुकाम आएका हुन्। इलाका प्रहरी कार्यालय क्यानेश्वरको पहलमा सदरमुकाम आउन सफल भएको पीडित सानुमानले बताए।

स्थानीय एकजनाको बच्चाको मृत्यु भएपछि उनीहरूमाथि बोक्साबोक्सीको आरोपमा कुटपिट गरिएको हो। सुरुमा सानीमायालाई दुव्र्यवहार गरेका उनीहरूले बचाउन गएका परिवारका सदस्यहरूलाई पनि सोही आरोपमा कुटपिट गरेका थिए।

पीडितहरू महिला सञ्जाल, जनजाति पत्रकार, मानवअधिकारवादीको संरक्षणमा सदरमुकाममा बसेका छन्। उनीहरूले बुधबार जिल्ला प्रहरी कार्यालयमा उजुरी दर्ता गराउने बताएका छन्।

सिन्धुलीका प्रहरी निरीक्षक नरेशराज सुवेदीले जाहेरीपछि कानुनी प्रक्रिया अघि बढाइने बताए।

सम्बन्धित खबरहरु