खुल्यो माथिल्लो तामाकोशीको शेयर, कर्मचारीलाई पाँच हजार, दोलखा जिल्लाबासीलाई ७० कित्ता मात्रै

यसमा भिन्दाभिन्दै रुपमा बर्गीकरण गरी शेयर आबेदन गर्न पाउने सीमा तोकिएको छ । सबै समूहकाले न्युनतम ५० कित्ताका लागि आबेदन गर्न पाए पनि अधिकतम सीमा भने फरक गरिएको छ । दोलखा जिल्लाबासीले जम्मा ७० कित्तासम्मका लागि मात्र आबेदन गर्न पाउँछन् भने आयोजना अति प्रभावित लामाबगर र गौरीशंकर गाउँ विकास समितिका बासिन्दाले तीनसय कित्तासम्मका लागि आबेदन गर्न पाउने भएका छन् । तर नागरिक लगानी कोष, कर्मचारी संचय कोष, विद्युत प्राधिकरण, बीमा संस्थान, नेपाल टेलिकमकाले भने पाँच हजार कित्तासम्म आबेदन गर्न पाउने भएका छन् । यस प्रकारको बांडफाँड भेदभावपूर्ण भएको भन्दै अदालतमा मुद्दा परे पनि अन्त्यमा उजुरी गर्नेको केही लागेन ।

कसरी आबेदन गर्ने ?

यसमा आबेदन गर्न योग्यता पुगेकाहरुले प्रति कित्ता १०० रुपैयाँका दरले रकम जम्मा गरी नागरिक लगानी कोष, एनसीम मर्चेन्ट बैंकिङ लिमिटेड कमलपोखरी र राष्ट्रिय बाणिज्य बैंकका देशभरिका शाखाहरुमा आबेदन पत्र बुझाउँन सक्ने भएका छन् । जिल्लाबासीको हकमा चरिकोट, सिंगटी र जिरी संकलन केन्द्रहरुमा निश्काशन तथा बिक्री प्रबन्धकहरुले बुझ्ने ब्यवस्था मिलाईएको छ । जिल्लाबासी आबेदकहरुको नाम हालै संकलन गरिएको जनसंख्या तथ्याँकमा समाबेश भएको हुनुपर्ने, जिल्लाबाट नागरिकता लिएको हुनुपर्ने र आयोजना सुरु हुनुभन्दा २०६४ माघ १५ अघि बसाई सरी आएको हुनुपर्ने अनिवार्य ब्यवस्था गरिएकोे छ । नेपाल टेलिकम र विद्युत प्राधिकरणका कर्मचारीहरुले भने नागरिक लगानी कोष, एनसीएम मर्चेन्ट बैंकिङको कार्यालय, सिद्दार्थ बिकास बैंकको कार्यालय, बुटवल, भैरहवा, घनगढी, नेपालगंज यति बिकास बैंकको हेटौडा, पोखरा, बीरगंज, बिराटलक्ष्मी बिकास बैंक बिराटनगर र सहयोगी बिकास बैंकको कायाृलय जनकपुरबाट मात्र बुझ्ने ब्यवस्था मिलाईएको आब्हान पत्रमा उल्लेख छ ।
शेयर हाल्ने पैसा नभएकालाई पनि ब्यवस्था

जिल्लाबासीका लागि छुट्याईएको शेयरमा लगानी गर्ने रकम नभएपनि चिन्ता लिनु नपर्ने भएको छ । जिल्लाबासीलाई कम्तिमा ७० कित्ता शेयर अनिवार्य रुपमा पर्नुपर्ने परिस्थिति सिर्जना गर्दै दोलखाका स्थानीय बैंक र सहकारीहरुले सहज रुपमा ऋण दिने ब्यवस्था गरेका छन् । आबेदनकसँग कुनै धितो नभए पनि शेयर आबेदन रसिदलाई नै धितो मानेर उनीहरुले ऋण प्रबाह गर्ने भएका छन् । सम्बन्धित ऋणीले ऋण चुक्ता नगरेसम्म शेयर आबेदन गरेको निस्सा र शेयर प्रमाणपत्र उनीहरुले नै राख्ने छन् । ऋणको सावाँ ब्याज नतिरेमा भने सम्बन्धित संस्थाले नै शेयर सकारी ऋण असुली गर्ने भएको छ । आबेदकहरुका लागि बैंक खाता अनिवार्य भएकाले ग्रामिण जिल्लाबासीका लागि खाता खोल्न भने समस्या हुनसक्ने देखिएको छ ।

शेयर किन्दा के फाईदा ?

यो शेयर तीन बर्षसम्म बिक्री गर्न बन्देज लगाईएको छ । ४५६ मेगावाट क्षमताको जलविद्युत आयोजनाको यो शेयरले अधिकतम मूल्य प्राप्त गर्ने हुँदा आबेदकहरुलाई भविष्यमा निकै लाभ प्राप्त हुने देखिएको छ । नेपालको आर्थिक बिकासमा जलविद्युतले महत्वपूर्ण भुमिका खेल्ने भएकाले कम्तिमा पाँच बर्षपछि यसको शेयर मूल्य पाँच हजार रुपैयाँ नाघ्नसक्ने विश्लेषण गरिएको छ । स्वदेशी पूँजी, शीप र क्षमता प्रयोग गरी निर्माण भएको यस आयोजनाले लगानीकर्तालाई दीर्घकालसम्म प्रतिफल दिईरहने छ । नेपाल विद्युत प्राधिकरणको ४१ प््रतिशत स्वामित्वमा रहेको आयोजनामा सर्वसाधारण लगानीकर्ताको पहुँच बढेपछि आयोजना झन् सबल हुने अपेक्षा गरिएको   छ ।

लामाबगरमा मूख्य केन्द्र रहेको आयोजनाको काम हाल २१ प्रतिशत सम्पन्न भईसकेको छ भने आयोजनाले २०७३ साउनबाट विजुली उत्पादन सुरु गर्ने लक्ष्य छ । आयोजनाको लागत ३६ अर्ब रहेकोमा हालसम्म २१ ऋर्ब खर्च भईसकेको छ । शेयरबाट उठेको रकम सोही आयोजना पुरा गर्न खर्च गरिने भएको छ ।

कति रकम संकलन होला ?

गाउँ गाउँमा समेत तामाकोशीको शेयरमा लगानी गर्ने उत्साह देखिएकाले यस क्रममा ठूलो रकम संकलन हुने अपेक्षा गरिएको छ । शेयरमा लगानीकै कारण कतिपय बैंक र सहकारीमा आर्थिक संकट आउनसक्ने र बाहिरी जिल्लाबाट ऋण लिनुपर्ने देखिएको छ । जिल्लाबासीले शेयरमा लगानी गर्न भन्दै दशै अगाडिदेखि नै रकमको जोहो गर्दै आएका छन् । हालै संकलित तथ्याँक अनुसार दोलखाको जनसंख्या २ लाख ८० हजार ५ सय ५८ रहेको छ । उनीहरुले प्रति ब्यक्ति ७० कित्ताका लागि आबेदन गरेमा दुई अर्ब रकम दोलखा जिल्लामा मात्रै संकलन हुने भएको छ ।
देशभरिका जनताका लागि चाँही शेयर कहिले ?

जिल्लाबासी र लगानीकर्ता कम्पनीका कर्मचारीका लागि निश्काशन गरिएको शेयर बिक्री प्रक्रिया पुरा भएपछि देशभरिका सर्वसाधारणका लागि यस कम्पनीको शेयर निश्काशन हुने भएको छ । जिल्लाबासी र लगानीकर्ता कम्पनीहरुका लागि निश्काशन गरिएको शेयर नबिकेमा देशभरिका सर्वसाधारणले किन्न पाउने छन् । देशभरिका सर्वसाधारणले माथिल्लो तामाकोशीको शेयरमा आबेदन गर्न आगामी बैसाखसम्म कुनुपर्ने देखिएको छ ।