जनबोली न्यूज नेटवर्क
जनबोली/३ फागुन, राजविराज ।नेपाली कांग्रेसका उपसभापति रामचन्द्र पौडेलले सहमतिको नाममा अनावश्यक हठलाई स्वीकार गर्न नसकिने बताएका छन्। आइतबार राजविराजमा आयोजित बुद्धिजीबीहरुसँगको अन्तरक्रियामा बोल्दै पौडेलले सहमतिका लागि आफूहरु तयार भए पनि अनावश्यक हठ भने स्वीकार्य नरहेको बताए।‘अन्तर्राष्ट्रिय जगतबाट पनि सहमतिमै संविधान बनाउन कुरा आइरहेको छ, हामि पनि सहमतिकै लागि प्रयास गरिरहेका छौं’, पौडेलले भने, ‘तर सहमतिको नाममा मुलुकलाई अनिर्णयको बन्दी बनाएर जनताको अभिमतलाई सधैं रोक्न सकिन्न।’
जनताको मतलाई रोकेर राख्नु, मुलुकलाई संक्रमणकालमा अलमल्याइरहनु अधिनायकवादकै उदाहरण भएको जिकिर गर्दै नेता पौडेलले आफूहरु यस्तो अधिनायकवादको मतियार बन्न नसक्ने स्पष्ट पारे। प्रतिपक्षीदलहरुले थालेको आन्दोलनको कुनै तुकै नरहेको बताउँदै उनले भने, ‘संविधानका लागि धेरै विषयमा करिब करिब कुरा मिलिसकेको छ, प्रदेश विभाजनका विषयमा मात्र केही कुरा नमिलेको अवस्थामा वार्ता र सहमतिलाई बाइपास गरेर आन्दोलनमा उत्रिनुको कुनै तुक छैन।’
लोकतन्त्रमा बहुमतको महत्व रहेको बताउँदै नेता पौडेलले बहुमतीय प्रणालीको आलोचना गर्नु लोकतन्त्रकै आलोचना भएको टिप्पणी गरे। उनले भने, ‘लोकतन्त्रमा बहुमत ग्राह्य हुन्छ (मेज्युरीटि मस्ट वि ग्रान्टेड), पूर्ण सहमति नभएको खण्डमा बहुमतका आधारमा अघि बढनु पनि जनमतकै कदर हुन्।’
पहिचानको कुरामात्रै उठाएर मुलुक र जनताको विकास सम्भव नरहेको बताउँदै नेता पौडेलले मुलुकको अवस्था धेरै वटा प्रदेशलाई धन्नसक्ने नरहेका कारण बढी ६ देखि ७ वटा प्रदेश उपयुक्त रहेको टिप्पणी गरे।
नेपाल शिक्षक संघ, पत्रकार, कानुन व्यवसायी, प्राध्यापक संघलगायतका बीच आयोजना भएको अन्तरक्रियामा नेबि संघका केन्द्रीय अध्यक्ष एवं सभासद रञ्जीतकुमार कर्ण, कांग्रेस केन्द्रीय सदस्य रामकुमार चौधरी, कल्याण गुरुङ्ग, सभासद सुरेन्द्रप्रसाद यादव लगायतकाहरुले समेत बोलेका थिए।
