जनबोली न्यूज नेटवर्क
काठमाडौं । गत महिना बिहे गरेर चर्चामा आउनु भएकी अभिनेत्री नीता ढुंगाना अस्पताल भर्ना हुनु भएको छ । अभिनेत्री ढुंगानामा एपेन्डिक्सको समस्या देखिएको हो ।
उहाँका अनुसार सोमबार बिहान चिकित्सकले उनको एपेन्डिक्सको शल्यक्रिया गरेका छन् । अहिले स्वास्थ्य अवस्था ठिक रहेको छ । ढुंगाना अझै दुई दिन अस्पतालमै बस्नुहुनेछ ।
आइतबार लाजिम्पाटमा एक पार्लर उद्घाटन गर्न आयोजित कार्यक्रममा जाने क्रममा उहाँको स्वास्थ्यमा अचानक समस्या देखिएको थियो । पहिले ॐ अस्पताल लगिएको थियो, तर त्यसपछि मेडिसिटी रिफर गरियो ।
नीताले ज्योतिष समेत रहेका हरिहरसँग विवाह गर्नुभएको छ । उहाँहरुले निर्माण गर्न लागेको फिल्म ह्रस्वदीर्घको दशैंपछि छायांकन हुँदैछ ।
‘कसम’ म्युजिक भिडियो सार्वजनिक
मोडल कमल सिंह र ललना चिमरियाबीचको प्रेम र रोमान्सले भरिपूर्ण अभिनय रहेको ‘कसम’ बोलको म्युजिक भिडियो सार्वजनिक भएको छ । भिडियोको छायाङ्कन गौतमबुद्ध जन्मस्थल लुम्बिनी क्षेत्रभित्र गरिएको छ । यस गीतमा स्वर गायक साइराज खातीको र शब्द कुमार मिश्रको र सङ्गीत अम्बर तुम्बापो सुब्बाको रहेको छ । गीतमा मोहित मुनालले सङ्गीत संयोजन गर्नुभएको हो ।
‘कसम तिम्रै माया लाग्छ’, ‘कसम तिम्रै याद आउँछ ढाँट्या होइन मैले तिम्रै माया लाग्छ’, ‘भूल्या छैन तिम्रो न्यानो माया’, ‘तिमी नै छाँै दिलको दायाँबायाँ’, ‘कसम तिम्रै माया लाग्छ, कसम तिम्रै मात लाग्छ’, ‘लजालु त्यो मुहार मिठो मुस्कान, मखमली केस, गाजलु ती नयन’लगायत बोलका गीत म्युजिक भिडियोमा समावेश गरिएको छ ।
बुद्ध थापाले खिच्नुभएको भिडियोलाई विकास दाहालले सम्पादन गर्नुभएको र भिडियोलाई प्रकाश धितालको कन्सेप्ट र निर्देशनमा तयार पारिएको हो । भिडियो ’केके अक्टेभ’ नामक युट्युब च्यानलमार्फत सार्वजनिक गरिएको छ । निर्माण समूहले भिडियो हेरेर प्रतिक्र्रिया दिन दर्शकसँग आग्रह गरेको छ ।