पटना । नेपालको छिमेकी भारतको नेपाली सीमा क्षेत्र उत्तराखण्डको उत्तरकाशी जिल्लामा भूकम्पको झट्का महसुस गरिएको छ। प्राप्त जानकारी अनुसार, भूकम्पको तीव्रता ३.६ रिक्टर स्केलमा मापन गरिएको हो। भूकम्प आज १४ अक्टोबर २०२५ को साँझ ७ बजेर ३० मिनेट १० सेकेन्ड (भारतीय समय अनुसार) मा आएको हो।
भूकम्पको केन्द्रविन्दु ३१.१५ अंश अक्षांश र ७७.९९ अंश देशान्तरमा रहेको थियो, जुन उत्तराखण्ड राज्यको क्षेत्रभित्र पर्छ। यसको गहिराइ जमिनको सतहबाट ५ किलोमिटर तल मापन गरिएको छ। कम तीव्रताको कारण झट्का धेरै बलियो थिएनन्। उत्तरकाशी क्षेत्र भूकम्पीय दृष्टिकोणले संवेदनशील मानिन्छ। हालसम्म यो भूकम्पबाट कुनै ठूलो क्षतिको खबर आएको छैन।
१९९१ को विनाशकारी भूकम्पको स्मरण
२० अक्टोबर १९९१ मा उत्तरकाशीमा एक विनाशकारी भूकम्प आएको थियो, जसले गढवाल हिमालय क्षेत्रलाई ठूलो क्षति पुर्याएको थियो। उत्तरकाशीमा जब कुनै प्राकृतिक विपत्ति आउँछ, त्यतिबेला प्रायः १९९१ को भूकम्पको चर्चा गरिन्छ। त्यो भूकम्पपछि दुई महिनासम्म उत्तरकाशीमा पटक–पटक झट्का महसुस गरिएको थियो। सो अवधिमा जम्मा १४२ पटक भूकम्प आएको थियो।
१९९१ को उक्त भूकम्पमा ७६८ जनाको ज्यान गएको थियो, ५०६६ जना घाइते भएका थिए । २०१८४ घर पूर्ण रूपमा ध्वस्त भएका थिए भने ७४७१४ घरमा आंशिक क्षति पुगेको थियो। पहाडी क्षेत्रमा आएको उक्त भूकम्पको तीव्रता ६.६ रिक्टर स्केलमा मापन गरिएको थियो। यसको झट्का दिल्ली र नेपालको काठमाडौंसम्म महसुस गरिएको थियो। भूकम्पका कारण भागीरथी र भीलांगना उपत्यकामा धेरै पहिरो गएको थियो, जसले ठूलो क्षति पुर्याएको थियो।
