ललितपुर । सामाजिक सञ्जालमार्फत चर्चामा आएकी टिकटकर तुलसा अधिकारी (तुलसी अधिकारी) विरुद्ध दायर भएको बहुचर्चित ठगी, आपराधिक लाभ तथा सम्पत्ति शुद्धीकरण मुद्दामा आज ललितपुर जिल्ला अदालतमा प्रारम्भिक सुनुवाइ सुरु भएको छ। जिल्ला न्यायाधीश भगवती शर्मा ढुंगानाको इजलासमा पेसी तोकिएसँगै यो बहुचर्चित प्रकरणले नयाँ कानूनी मोड लिएको छ।
हाल पुर्पक्षका लागि थुनामा रहेकी अधिकारीलाई यसअघि प्राप्त प्रमाणका आधारमा अदालतले थुनामा पठाउने आदेश दिएको थियो। उनीविरुद्ध सरकारी वकिल कार्यालयले ६ करोड ५२ लाख २९ हजार रुपैयाँ बिगो दाबी गर्दै सम्पत्ति शुद्धीकरण, आपराधिक लाभ र ठगीसम्बन्धी मुद्दा दायर गरेको छ।
अनुसन्धानका क्रममा इन्टरपोलको रेड नोटिस जारी भएपछि अधिकारीलाई थाइल्यान्डबाट पक्राउ गरी नेपाल ल्याइएको थियो। उनी चीनमा छु भनेर थाइल्याण्डमा भासिएकी थिइन् । यो घटनाले अन्तर्राष्ट्रिय तहसम्म नेपाली अनुसन्धानको पहुँच पुगेको देखिएको छ। मुद्दाको केन्द्रमा ललितपुरका एक व्यवसायीको जाहेरी छ। व्यवसायीले अधिकारीले बलात्कार मुद्दामा फसाइदिने धम्की दिँदै लामो समयसम्म ब्ल्याकमेल गरेर करिब ४ करोड ५० लाख रुपैयाँ बराबरको नगद तथा जिन्सी लिएको आरोप लगाएका छन्।
यही घटनालाई आधार बनाएर अनुसन्धान अघि बढाउँदा सम्पत्ति शुद्धीकरणपनि जोडिएको छ । उनले पैसा कमाएरपनि राज्यलाई ठगेको अभियोग छ । यस मुद्दामा तुलसा अधिकारीसहित १० जना प्रतिवादी रहेका छन्। अदालतले आजको सुनुवाइपछि मुद्दाको आगामी प्रक्रिया, प्रमाणको मूल्याङ्कन तथा बहसको दिशा तय गर्नेछ।
