काठमाडौं – भारतीय हिरा व्यापारी नीरव मोदी कहिले ओस्कारको रातो कार्पेटमा केट विन्सलेटका गहनाले चम्किएका नाम बने, कहिले करिब २ अर्ब अमेरिकी डलर बराबरको बैंक घोटालामा फसेर भारतकै इतिहासमा सबैभन्दा ठूलो वित्तीय काण्डका अभियुक्त बने। १९७१ मा गुजरातको पालनपुरमा जन्मिएका मोदी तेस्रो पुस्ताका व्यापारी हुन्। उनले १९९९ मा फायरस्टार डायमन्ड स्थापना गरी न्युयोर्क, लन्डनदेखि हङकङसम्म बुटिक विस्तार गरे। उनका गहना क्रिस्टीजको लिलामीमा करोडौँ डलरमा बिक्री भए, प्रियंका चोपडासम्म ब्रान्ड एम्बेसेडर बने।
तर २०१८ मा पञ्जाब नेसनल बैंकबाट नक्कली ‘लेटर अफ अन्डरटेकिङ’ प्रयोग गरी ठगी गरेको आरोप लागेपछि उनको साम्राज्य भत्कियो। २०१९ मा लन्डनमा पक्राउ परेका मोदी भारत सुपुर्दगी रोक्न कानुनी लडाइँ लडिरहेका छन्।
उनको जीवन बाल्यकालमै आमाको आत्महत्यादेखि सुरु भएको त्रासदी, विलासी गहना साम्राज्यको उदय र अहिले कानुनी संकटसम्मको कथा हो। भारत फर्काइएमा यो केवल कानुनी मुद्दा मात्र नभई ‘धनी र शक्तिशाली कानुनबाट उम्कन्छन्’ भन्ने बहसको निर्णायक क्षण बन्न सक्ने देखिन्छ।
