काठमाडौं – इरान र अमेरिकाबीच बढ्दो तनाव तथा होर्मुज जलघाँटी पुनः खोलिने विषयमा अनिश्चितता कायम रहँदा अन्तर्राष्ट्रिय बजारमा कच्चा तेलको मूल्य बढेको छ।
रोयटर्सका अनुसार सोमबार बिहान ब्रेन्ट क्रुड तेलको वायदा मूल्य ९१ सेन्ट (१.०९%) बढेर प्रतिब्यारेल ८४.४६ अमेरिकी डलर पुगेको छ। त्यस्तै, अमेरिकी वेस्ट टेक्सास इन्टरमिडिएट (WTI) तेल ६१ सेन्ट (०.७८%) बढेर प्रतिब्यारेल ७८.७९ डलरमा पुगेको छ।
गत साता भने दुवै प्रमुख तेलको मूल्य ७% भन्दा बढीले घटेको थियो। इरान–ओमान सम्झौता नजिकिएको र जलघाँटी खुल्ने आशाले मूल्य घटेको भए पनि अहिले अमेरिकाले सर्त पूरा नगरेसम्म सम्झौता अघि बढ्दैन भन्ने इरानको भनाइले बजारमा फेरि अनिश्चितता बढाएको छ।
युद्धअघि विश्व तेल आपूर्तिको करिब पाँचौँ हिस्सा होर्मुज जलमार्गमार्फत हुने भएकाले यसको बन्दीले आपूर्ति संकटको चिन्ता बढाएको छ।
प्रकाशित मिति : २०८३ साउन २५ गते सोमवार
