काठमाडौँ । आगामी फेब्रुअरी १५ मा श्रीलंकाको कोलम्बोमा हुने आईसीसी टी-२० विश्वकप २०२६ को समूह चरणको खेलमा पाकिस्तानले भारतको सामना गर्ने निश्चित भएको छ । यसअघि भारतसँगको खेल बहिष्कार गर्ने अडान राखेको पाकिस्तानले अन्तर्राष्ट्रिय समुदाय र क्रिकेट जगतको आग्रहमा आफ्नो निर्णय फिर्ता लिएको हो ।
पाकिस्तान सरकारले सामाजिक सञ्जाल एक्स मार्फत मैत्रीपूर्ण देशहरूको अनुरोध र पछिल्लो समयमा भएका सहमतिलाई ध्यानमा राख्दै टोलीलाई भारतविरुद्ध मैदान उत्रन अनुमति दिएको जानकारी दिएको छ । पाकिस्तान क्रिकेट बोर्ड पीसीबीका अध्यक्ष मोहसिन नक्वीले आईसीसी र बंगलादेश क्रिकेट बोर्ड बीसीबीसँग भएको छलफलको निष्कर्षबारे प्रधानमन्त्री शहबाज शरीफलाई जानकारी गराएका थिए ।
श्रीलंकाका राष्ट्रपति अनुर कुमार दिसानायकेले पाकिस्तानी प्रधानमन्त्री शरीफलाई टेलिफोन गरी क्रिकेटको गतिरोध अन्त्य गर्न र सकारात्मक निर्णय लिन आग्रह गरेका थिए। बंगलादेश बीसीबी, श्रीलंका र संयुक्त अरब इमिरेट्स यूएई लगायतका सदस्य राष्ट्रहरूले पाकिस्तानलाई नेतृत्वदायी भूमिका खेल्न र खेल सुचारु गर्न औपचारिक पत्राचार गरेका थिए ।
प्रकाशित मिति : २०८२ माघ २८ गते मङ्गलवार
