काठमाडौं । काठमाडौँ उपत्यकामा खाना पकाउने एलपी ग्यासको चरम अभाव देखिएको छ । भोटेकोशी बाढी र सडक अवरोधका कारण आपूर्ति सहज हुन नसक्दा उपभोक्ताहरू घण्टौँ लामबद्ध हुन बाध्य भएका छन् । सरकारले अभाव नरहेको दाबी गरे पनि नागरिकहरू दिनभर लाइनमा बसिरहेका छन् । खुद्रा विक्रेताहरूले वितरण व्यवस्थित गर्न कुपन प्रणाली अपनाएका छन् । कोटेश्वरका व्यवसायी शङ्करकुमार श्रेष्ठका अनुसार दैनिक १५० सिलिण्डर मात्र वितरण भइरहेको छ । अपाङ्गता भएका व्यक्तिका लागि थप १० सिलिण्डर छुट्याइएको छ ।
भीड व्यवस्थापनका लागि सिलिण्डरमा नम्बरिङ र नामसहित कुपन बाँडेर भोलिपल्ट ग्यास दिने व्यवस्था गरिएको छ । तर उपभोक्ताहरूले ठूलो सास्ती भोग्नुपरेको गुनासो गरेका छन् । जडिबुटीका राकेश विष्टले कुपन लिए पनि ग्यास नपाएको बताए । बिहानैदेखि लाइनमा बसेर पनि ग्यास नपाउँदा आक्रोश व्यक्त गरिएको छ । स्थानीय डिपोहरूमा ग्यास पुग्न नसक्दा समस्या थप जटिल बनेको छ ।
रसुवामा आएको बाढी अघिदेखि सुरु भएको अभाव सडक अवरोध र यातायात कठिनाइका कारण अझै गहिरिएको छ । मागअनुसार सिलिण्डर उपलब्ध नभएपछि सर्वसाधारण दैनिक काम छाडेर ग्यास खोजीमा भौँतारिन बाध्य भएका छन्।
