मुंबई । डिफेन्डिङ च्याम्पियन भारतीय टोलीले टी–२० विश्वकप २०२६ को सुरुवात विजयी ढंगले गरेको छ। अमेरिकाले सूर्यकुमार यादवको टोलीलाई कडा परीक्षा लिए पनि अन्ततः भारतले २९ रनले खेल जित्यो। टस जितेर पहिले ब्याटिङ गर्दा भारतले ९ विकेटमा १६१ रन बनायो। एक समय टोली १५० रनसम्म पुग्ने सम्भावना कम देखिएको थियो। अमेरिकासँग उलटफेर गर्ने राम्रो मौका थियो तर टोलीले २० ओभरमा ८ विकेटमा १३२ रन मात्र बनाउन सक्यो।
पावरप्लेमा भारतका ४ विकेट गुमे
पहिले ब्याटिङ गर्न उत्रिएको भारतको सुरुवात राम्रो भएन। सलामी ब्याट्सम्यान अभिषेक शर्मा पहिलो बलमै शून्यमा आउट भए। त्यसबेला स्कोर ८ रन मात्र थियो। दोस्रो विकेटका लागि ईशान किशन र तिलक वर्माबीच ३७ रनको साझेदारी भयो। तर पावरप्लेको अन्तिम ओभरमा शैडली भान शाल्कविकले ईशान, तिलक र शिवम दुबे तीनै जनालाई आउट गर्दै भारतलाई ठूलो धक्का दिए। किशनले १६ बलमा २० रन बनाए भने तिलक वर्माले १६ बलमा २५ रन बनाए।
कप्तान सूर्यकुमार यादवको दमदार प्रदर्शन
रिंकू सिंह (६) र हार्दिक पाण्ड्या (५) पनि खास योगदान दिन सकेनन्। तर कप्तान सूर्यकुमार यादवले एक छेउ सम्हाल्दै खेले। उनले अक्षर पटेलसँग सातौँ विकेटका लागि ४१ रनको साझेदारी गर्दै टोलीलाई १०० रन पार गराए। लगातार विकेट झर्दा पनि चौथो नम्बरमा ब्याटिङ गर्न आएका कप्तान यादव क्रीजमा टिके र उत्कृष्ट अर्धशतक बनाए। यो उनको टी–२० करियरको २५औँ अर्धशतक थियो।
सूर्यकुमार यादव ४९ बलमा ४ छक्का र १० चौकाको मद्दतले ८४ रन बनाएर नटआउट रहे। अन्तिम ओभरमा सौरभ नेत्रवलकरलाई उनले २ चौका र २ छक्का प्रहार गर्दै २१ रन जोडे र भारतलाई ९ विकेटमा १६१ रनसम्म पुर्याए। उनको यो योगदान नै टीमका लागि जित बन्यो । अमेरिकाका शैडली भान शाल्कविक सबैभन्दा सफल बलर बने। उनले ४ ओभरमा २५ रन खर्चेर ४ विकेट लिए। हरमीत सिंहले पनि ४ ओभरमा २६ रन खर्चेर २ विकेट लिए।
प्रकाशित मिति : २०८२ माघ २५ गते शनिवार
