काठमाडौं । प्रत्येक वर्ष कार्तिक शुक्ल द्वितीयाका दिन मनाइने नेपालीको दोस्रो ठूलो चाड तिहारको मुख्य दिन आज दाजुभाईले दिदीबहिनीबाट टीका लगाएका छन्। यमपञ्चक पनि भनिने तिहारको पाँचौं एवं अन्तिम दिन भाइटीका पर्व दिदीबहिनीले आफ्ना दाजुभाईलाई श्रद्धा, आस्था र निष्ठाका साथ दीर्घायु, आरोग्य र ऐश्वर्य प्राप्तिको कामना गर्दै परम्पराअनुसार टीका लगाएर मनाइएको हो।
आज भाइटीका लगाएसँगै नेपालीको दोस्रो चाड तिहार पनि समाप्त भएको छ। दिदीबहिनीले दाजुभाईलाई टीका लगाएपछि दाजुभाईले पनि दिदीबहिनीलाई टीका लगाउने गरिन्छ। दिदीबहिनीलाई पूजा गर्नाले अखण्ड सौभाग्य र ऐश्वर्य प्राप्त हुने शास्त्रीय मान्यता रहेको धर्मशास्त्रविद् प्राडा रामचन्द्र गौतमले जानकारी दिनुभयो।
राज्य सञ्चालकले भने साइतमै टीका लगाउनुपर्ने शास्त्रीय मान्यताअनुसार बिहान ११ः३७ बजे नै टीका लगाएको जनाइएको छ। आज लक्ष्मी पूजाका दिन स्थापना गरिएको दियो, कलश र गणेशको पूजा गरी मूल थालीमा लेखिएको अष्टदलमा विभिन्न चिरञ्जीवीहरूको पूजा आराधना गरिएको छ।
भाइटीका लगाउने चलन अनुसार दिदीबहिनीले दाजुभाईलाई तेलको धाराले छेकेर पञ्चरङ्गी वा सप्तरङ्गी टीका लगाइदिएका छन्। दिदीबहिनी र दाजुभाईले एकअर्कालाई ओखर, कटुस, मर मसला र सेलरोटीलगायतका खानेकुरा दिने र गच्छेअनुसार कपडा र दक्षिणा दिई सम्मान प्रकट गर्ने परम्परा पनि रहिआएको छ।
दिदीबहिनी नहुनेका लागि काठमाडौंको रानीपोखरीको बीचमा रहेको बालगोपालेश्वर मन्दिर आज मात्र खुला गरिएको थियो। यहाँ हजारौँ भक्तजनले पूजा आराधना गरी प्रसाद लिएका छन्। खञ्जनेश्वर महादेव मन्दिरमा पनि आज दिदीबहिनी नहुने दाजुभाईले पूजाआजा गरी टीका लगाएका छन्।
यसैक्रममा, रानीपोखरीमा भक्तजनको पनि भीड लागेको थियो। दाजुभाई तथा दिदीबहिनी नहुने भक्तजनहरूले आजको दिन विशेष पूजा आराधना गर्दै टीका लगाएका छन्। मन्दिरमा काम गर्दै आउनुभएका भक्तजनको अनुसार, मन्दिरमा आज दिनभर नै घुइँचो लागेको छ।
यसरी, भाइटीकासँगै तिहारको चाड पनि सकियो र भक्तजनहरूले विभिन्न शक्तिपीठमा पूजा आराधना गरी स्नेह र श्रद्धासाथ टीका लगाएका छन्।
प्रकाशित मिति : २०८१ कार्तिक १८ गते आइतवार
