काठमाडौं । अमेरिकाले दक्षिण अफ्रिकाका राजदूत इब्राहिम रसूललाई देश निकाला गरेको छ। अमेरिकी विदेशमन्त्री मार्को रुबियोले एक्स (ट्वीटर) मा लेखेर रसूलले अमेरिका र अमेरिकी राष्ट्रपतिलाई ‘घृणा’ गरेको भन्दै अस्वीकार्य व्यक्ति घोषणा गरेका छन्।
रुबियोले भने, “दक्षिण अफ्रिकाका राजदूतलाई अब हाम्रो महान देश अमेरिकामा स्वागत छैन। इब्राहिम रसूल एक जातिवादी राजनीतिज्ञ हुन् जसले अमेरिका र ट्रम्पलाई घृणा गर्छन्। हामीलाई उहाँको बारेमा केही भन्नु छैन।”
यो निर्णय अमेरिका र दक्षिण अफ्रिकाबीच बढ्दो तनावको बीचमा आएको हो। यसअघि फेब्रुअरीमा ट्रम्पले दक्षिण अफ्रिकालाई अमेरिकी सहयोगमा प्रतिबन्ध लगाएका थिए र दक्षिण अफ्रिकी कानुनको उद्धरण गर्दै गोरा किसानहरूको जमिन जफत गर्न सकिने बताएका थिए।
गत हप्तामा ट्रम्पले दक्षिण अफ्रिकी किसानहरूलाई अमेरिकामा बसोबास गर्न स्वागत गरेको बयान दिएका थिए, जसले दुई देशबीचको तनावलाई थप उजागर गरेको छ।
प्रकाशित मिति : २०८१ चैत्र १ गते शनिवार
