काठमाडौं । हलिउड अभिनेत्री सिड्नी स्वीनीको एचबीओ सिरिज युफोरिया मा गरेको अभिनयले उनको परिवारमा असहज स्थिति सिर्जना गरेको छ। २७ वर्षीया अभिनेत्री स्वीनीले उक्त सिरिजमा क्यासी हावर्डको भूमिका निर्वाह गरेकी छन्, जसमा उनले निकै बोल्ड र स्पष्ट दृश्यहरूमा अभिनय गरेकी छन्। उनको यो भूमिकालाई लिएर उनको बाबुले असहज महसुस गर्दै हलबाट बाहिरिएको खबरले सामाजिक सञ्जालमा चर्चा पाएको छ।
सिड्नीले एक अन्तर्वार्तामा आफ्नो बाबु र हजुरबुबाले युफोरिया हेर्ने क्रममा असहज महसुस गरेर सिरिज बन्द गरेर बाहिरिएको खुलासा गरेकी छन्। उनले आफ्नी आमालाई सेटमा धेरै पटक भेटेकी भएकाले उनलाई सिरिजको कथावस्तुबारे थाहा भएको तर बाबुलाई भने कुनै जानकारी नदिएको बताइन्। “मेरो बाबुलाई मैले सिरिजको बारेमा केही पनि भनेको थिइनँ,” उनले हाँस्दै भनिन्। तर, उनकी हजुरआमाले भने सिरिज हेरेर उनको अभिनयको प्रशंसा गरेको उनले बताइन्।
युफोरिया सन् २०१९ मा प्रसारणमा आएको एक चर्चित सिरिज हो, जसले किशोरावस्थाका जटिल समस्याहरू जस्तै लागूपदार्थ दुरुपयोग, यौनिकता, र मानसिक स्वास्थ्यका मुद्दाहरूलाई चित्रण गरेको छ। सिड्नीको क्यासी हावर्डको चरित्रले विशेषगरी यौनिकता र आत्मसम्मानसँग सम्बन्धित मुद्दाहरूलाई उजागर गरेको छ। यो सिरिजमा उनको अभिनयले उनलाई सन् २०२२ मा प्राइमटाइम एमी अवार्डको लागि उत्कृष्ट सहायक अभिनेत्रीको मनोनयनसमेत प्राप्त गरेको थियो।
सामाजिक सञ्जाल एक्समा यो घटनाले व्यापक चर्चा पाएको छ। एक प्रयोगकर्ताले लेखे, “उनको बाबुले सिरिज हेरेर पछि मात्र बाहिर निस्कनुभयो? ” अर्का प्रयोगकर्ताले भने, “आफ्नी छोरीलाई यस्तो दृश्यमा देख्नु कुनै पनि बाबुको लागि सहज हुँदैन।” सिड्नीले भने आफ्नो अभिनयको बचाउ गर्दै यस्ता दृश्यहरू कथाको मागअनुसार भएको र वास्तविक कथावस्तु प्रस्तुत गर्न आवश्यक रहेको बताएकी छन्।
यो घटनाले हलिउडमा अभिनयको दौरान परिवार र व्यक्तिगत सम्बन्धमा पर्ने प्रभावबारे बहस सिर्जना गरेको छ। सिड्नी स्वीनी हाल द ह्वाइट लोटस र इम्याकुलेट जस्ता परियोजनाहरूमा आफ्नो अभिनयको छाप छोड्दै हलिउडमा आफ्नो स्थान बलियो बनाउँदै छिन्।
प्रकाशित मिति : २०८१ चैत्र १७ गते सोमवार
