काठमाडौं/ संयुक्त राज्य अमेरिका ले ईरान को अत्यन्तै महत्वपूर्ण तेल निर्यात केन्द्र खार्ग टापुमा रहेका सैन्य संरचनाहरूलाई लक्षित गर्दै आक्रमण गरेको छ। एक अमेरिकी अधिकारीका अनुसार यी आक्रमणहरू तेल सम्बन्धी संरचनामा नभई विशुद्ध रूपमा सैन्य लक्ष्यहरूमा केन्द्रित थिए। अमेरिकी उपराष्ट्रपति जेडी भान्सले हालैका आक्रमणलाई स्वीकार गर्दै यो कदमले अमेरिकी रणनीतिमा कुनै परिवर्तन नगरेको बताएका छन्। उनले यो अभिव्यक्ति राष्ट्रपति डोनाल्ड ट्रम्प ले इरानलाई स्ट्रेट अफ होर्मुजपुनः खोल्न दिएको समयसीमा अगाडि दिएका हुन्।
इरानी स्रोतहरूका अनुसार आक्रमणपछि गरिएको प्रारम्भिक मूल्याङ्कनले खार्ग टापुको मुख्य तेल ढुवानी पूर्वाधार प्रायः सुरक्षित रहेको देखाएको छ। राज्य–सम्बद्ध मिडियाले स्थानीय स्रोतलाई उद्धृत गर्दै अधिकांश संरचना सामान्य रूपमा सञ्चालनमै रहेको जनाएको छ।
इरानको अर्ध–सरकारीमेहर न्यूज एजेन्सी का अनुसार टापुको समुद्री पूर्वाधार—जसले करिब ९० प्रतिशत इरानी कच्चा तेल निर्यात सम्हाल्छ—मा न्यून क्षति पुगेको छ र सञ्चालनमा कुनै ठूलो अवरोध आएको छैन।
यसअघि पनि युनाइटेड स्टेट्स सेन्ट्रल कमाण्ड ले मार्च महिनामा खार्ग टापुमा करिब ९० वटा लक्ष्यमा आक्रमण गरेको थियो। तीमध्ये नौसैनिक माइन्स भण्डारण स्थल, मिसाइल भण्डारण बंकरहरू र अन्य सैन्य संरचनाहरू रहेका थिए।
इरानको तट नजिकै रहेको खार्ग टापु देशको अर्थतन्त्रका लागि जीवनरेखा जस्तै हो, किनकि यही टापुबाट करिब ९० प्रतिशत कच्चा तेल निर्यात हुने गर्दछ।
