काठमाडौं । नेपाल प्रहरीका पूर्वडीआईजी रमेश खरेलले नेपाल विद्युत् प्राधिकरणका कार्यकारी निर्देशक कुलमान घिसिङविरुद्ध अख्तियार दुरुपयोग अनुसन्धान आयोगमा उजुरी दिनुभएको छ । ‘एन्टिकरप्सन नेटवर्क’ को तर्फबाट सम्पूर्ण प्रमाणसहित उजुरी दिएको खरेलले जानकारी दिनुभयो । उहाँले आफ्नो उजुरीमा राज्यलाई करोडौँ रुपैयाँ घाटा हुनेगरी पीपीए गरेको उल्लेख गर्नुभएको छ ।
ऊर्जा उत्पादक कम्पनीसँग विद्युत खरिदका लागि पीपीए गर्दा उक्त घोटाला भएको उहाँले उजुरीमा उल्लेख गर्नुभएको छ । घिसिङले प्राधिकरणको प्रबन्ध निर्देशक भएर राज्यलाई करोडौं रुपैयाँ घाटा हुने गरी जलविद्युत कम्पनीसँग विद्युत खरिद बिक्री सम्झौता (पीपीए) गरेको दाबी गर्दै खरेलले उहाँविरुद्द भ्रष्टाचारको उजुरी दिनुभएको हो । घिसिङले ६६ वटा कम्पनीसँग पीपीए गर्दा कानून मिचिएको र त्यसले राज्यलाई १ करोड १७ लाख २६ हजार ५२० रुपैयाँ राजस्व घाटा भएको दाबी खरेलको छ ।
खरेलका अनुसार विद्युत नियमन आयोगमा निश्चित शुल्क बुझाएर पीपीएको अनुमति लिनुपर्नेमा घिसिङले नियमन आयोगको स्वीकृति नलिई पीपीए गरेर राज्यलाई घाटा लगाउनुभएको छ । घिसिङले प्राधिकरणलाई नक्कली नाफामा देखाएको दाबी पनि खरेलले उजुरीमा गर्नुभएको छ ।
