काठमाडौं। १०३ दिनपछि काठमाडौं महानगरपालिकाका प्रमुख प्रशासकीय अधिकृत सरोज गुरागाईं कार्यालय हाजिर भएका छन्।
बिहीबार उनले कर्मचारी र नगर प्रहरीबीचको तनावको बीचमा कार्यकक्षमा प्रवेश गरी हाजिर गरेका हुन्। मेयर बालेन शाहको निर्देशनमा महानगरको टोलीले उनलाई कार्यालय प्रवेश गर्न रोक्नको प्रयास गरेको थियो, तर सचिवालयको प्रयास असफल भएको छ।
मेयर बालेन शाहका प्रमुख स्वकिय सचिव भूपदेव शाहले भने, ‘सरकारले स्पष्ट रुपमा गल्ती देखाइसकेको व्यक्तिलाई कार्यालय प्रवेश गराउने जुन नाटकमञ्चन गरिएको छ, यो दमनको विषयान्तर गर्नको लागि हो।’ उनले थपे, ‘यदि प्रमुख प्रशासकीय अधिकृत गुरागाईं भ्रष्टाचारको दोषी ठहरिए भने विरोधमा उत्रिएका जनप्रतिनिधि र कर्मचारी पनि जेल जान तयार रहनुपर्छ।’
सचिवालयको यस भनाइले स्थिति अझै जटिल बनाएको छ, जहाँ सरकारको दृषटिकोन र महानगरपालिकाको आन्तरिक विवाद झल्किएको छ। गुरागाईंलाई कार्यालय प्रवेश नगर्ने प्रयास गर्न महानगर प्रहरी खटाइएको थियो, तर कर्मचारीहरूले उनलाई कार्यकक्षसम्म पुर्याए र कार्यालय प्रवेश गर्न बाध्य गरे।
गुरागाईंलाई गत पुस ७ गतेदेखि बिदामा राखिएको थियो। त्यसपछि नियुक्त भएका गोविन्दप्रसाद शर्माले राजीनामा दिएका थिए, जसका कारण महानगर प्रमुख प्रशासकीय अधिकृतविहीन थियो। यस स्थितिमा कर्मचारीहरूले तलबसमेत नपाएको भन्दै आक्रोश व्यक्त गरेका छन्।
उपमेयर सुनिता डंगोलले मेयर शाहलाई समस्याको समाधानमा लाग्न र कोठाभित्र बसेर निर्देशन नगर्न आग्रह गर्दै सहयोगका लागि अपिल गरेकी छिन्।
