काठमाडौं । सरकारले हप्तामा शनिबार–आइतबार दुई दिन सार्वजनिक बिदा लागू गर्नुका साथै करिब ७ सय सरकारी सवारी साधन फिर्ता गरेपछि इन्धन खपतमा ठूलो गिरावट आएको छ। चैत, वैशाख र जेठ महिनामा पेट्रोल र डिजेल आयात कुल ६ करोड ९० लाख लिटरले घट्दा बजार मूल्य अनुसार करिब १४ अर्ब ६० करोड रुपैयाँ बराबरको कारोबार बचत भएको छ। कर र आन्तरिक खर्च घटाएर वास्तविक विदेशी मुद्रा बचत करिब १० अर्ब रुपैयाँ बराबर भएको छ।
नेपाल आयल निगमका अनुसार पेट्रोल आयात २ करोड ६२ लाख लिटर र डिजेल आयात ४ करोड २७ लाख लिटरले घटेको छ। वैशाख महिनामा मात्र ९ अर्ब ६० करोड रुपैयाँ बराबरको इन्धन कारोबार बचत भएको थियो। प्रधानमन्त्री बालेन्द्र शाहको सवारी फिर्ता अभियान र दुई दिने बिदाको संयुक्त प्रभावले इन्धन खपत घटाउन र विदेशी मुद्रा जोगाउन ठूलो भूमिका खेलेको प्रवक्ता हेमराज अर्यालले बताए। यो कदमले अर्थतन्त्र दबाबमा रहेका बेला सानो देखिने नीतिगत निर्णयले पनि ठूलो वित्तीय राहत दिन सक्ने उदाहरण प्रस्तुत गरेको छ।
