२१ फागुन, हेटौँडा । पश्चिम मकवानपुरको मनहरिमा मङ्गलवार साँझ एक नवजात शिशुको शव फेला परेको छ । मनहरी गाउँपालिका–७ डम्पिङसाईटमा नवजात शिशु छोरीको शव फेला परेको जिल्ला प्रहरी कार्यालय मकवानपुरले जनाएको छ ।
इलाका प्रहरी कार्यालय मनहरीबाट प्रहरी निरीक्षक विशाल सापकोटाको नेतृत्वमा पुगेको प्रहरी टोलीले शव को कसले फालेको हो भन्ने खोजी गरिरहेको छ । प्रहरीका अनुसार अन्दाजी एक दुई दिन अगाडि जन्माएर फालेको हुनसक्ने अनुमान गरिएको छ ।
घटनाको आवश्यक अनुसन्धान भइरहेको जिल्ला प्रहरी कार्यालय मकवानपुरका प्रहरी नायब उपरीक्षक श्यामु अर्यालले जानकारी दिए । गत वर्ष चैतमा पनि मनहरी–७ रमौली बांगेटोल स्थित मनहरी खोलाको छेउमा सालनालसहित नवजात शिशुको शव फेला परेको थियो ।
प्रकाशित मिति : २०८१ फाल्गुन २१ गते बुधवार
