काठमाडौँ। युक्रेनका राष्ट्रपति भोलोदिमिर जेलेन्स्कीले रुससँग तीन वर्षदेखि चलिरहेको युद्ध अन्त्य गर्न वार्ताको प्रस्ताव राखेपछि क्रेमलिनले यसलाई “सकारात्मक” भनेको छ। मङ्गलबार जेलेन्स्कीले “स्थायी शान्तिका लागि जतिसक्दो चाँडो वार्तामा आउन तयार” रहेको बताएका थिए। क्रेमलिनका प्रवक्ता दिमित्री पेस्कोभले यो दृष्टिकोणलाई सकारात्मक भन्दै पुटिनसँग प्रत्यक्ष वार्ताको सम्भावनामा भने शङ्का व्यक्त गरे।
अमेरिकी राष्ट्रपति डोनाल्ड ट्रम्पले कङ्ग्रेसमा जेलेन्स्कीको पत्र पढेर सुनाएका थिए, जसमा उनी शान्ति वार्ताका लागि तयार रहेको उल्लेख छ। तर, गत शुक्रबार ओभल अफिसमा भएको चर्काचर्कीपछि ट्रम्पले युक्रेनलाई अमेरिकी सैन्य सहायता रोकेका छन्। ट्रम्पले जेलेन्स्कीलाई मस्कोसँग शान्ति सम्झौता गर्न दबाब दिएको आशङ्का युक्रेन र युरोपमा बढेको छ।
क्रेमलिनले जेलेन्स्कीको वैधानिकतामाथि प्रश्न उठाउँदै उनको कार्यकाल २०१९ मा सुरु भएर सकिएको दाबी गरेको छ, तर युक्रेनको युद्धकालीन कानुनले चुनावमा प्रतिबन्ध लगाएको छ। यसलाई युरोपेली सहयोगीहरूले समर्थन गरेका छन्। ट्रम्पले भने जेलेन्स्की अलोकप्रिय भएको झूटो दाबी गर्दै चुनाव गर्न दबाब दिएका छन्।
यसैबीच, रुसी सेनाले डोनेट्स्कको एउटा सानो गाउँ कब्जा गरेको छ। इन्स्टिच्युट फर द स्टडी अफ वार (आईएसडब्लु) का अनुसार रुसको प्रगति फेब्रुअरीमा सुस्त भएको छ, तर जमिन कब्जा जारी छ।
प्रकाशित मिति : २०८१ फाल्गुन २२ गते बिहिवार
